Azərbaycanı suriyalaşdırma cəhdi - RƏY

“İyul ayının 10-da Gəncə şəhər İcra Hakimiyyətinin inzibatı binası qarşısında bir qrup radikal tərəfindən asayişin pozulmasına cəhd edilməsi bir daha göstərdi ki, bir neçə gün əvvəl törədilən terror hadisəsi təsadüfi deyil və bəzilərinin təqdim etməyə çalışdığı kimi, məişət zəminində baş verməyib”.

 

Bunu APA-ya açıqlamasında millət vəkili, “Yeni Azərbaycan” qəzetinin baş redaktoru Hikmət Babaoğlu bildirib.

 

H. Babaoğlu deyib ki, bu hadisə antiazərbaycançı güc mərkəzləri tərəfindən təşkil edilmiş məqsədyönlü terror hadisəsidir və Azərbaycanda ictimai-siyasi sabitliyi pozmağa yönəlib: “Baş vermiş terror hadisəsindən dərhal sonra sosial şəbəkələrdə və bəzi internet resurslarında terroristdən zərərçəkən obrazının yaradılmasına cəhdlərin olması uzun illərdir Azərbaycana qarşı ermənilərlə birlikdə fəaliyyət göstərən xaricdəki passiv terroristlərin birdən-birə aktivləşməsi, separatçı Ələkrəm Hümbətovun terrorçunun hüquqlarını müdafiə komitəsi yaratması kimi hadisələr belə qənaətə gəlməyə əsas verir ki, bütün bunlar bir mərkəzdən koordinasiya edilən və ölkəmizdə xaosa və qarşıdurma yaratmağı qarşılarına məqsəd qoyan ermənipərəst mərkəzlərin əvvəlcədən planlaşdırdıqları hadisələrdir. Son məqsəd Yaxın Şərqin müsəlman ölkələrinə tətbiq edilən idarəolunan xaos siyasətini Azərbaycana transfer etməklə ölkəmizi terror poliqonuna çevirmək və beləliklə, Dağlıq Qarabağ problemini birdəfəlik unutdurmaqdır. Ancaq  hadisələrin inkişafı göstərdi ki, bu məkrli planı Azərbaycanda həyata keçirmək o qədər asan məsələ deyil. Çünki hər şeydən öncə Azərbaycanda funksional dövlət institutları, kifayət qədər effektiv fəaliyyət göstərən mərkəzi icra hakimiyyəti orqanları və nəhayət, əmin-amanlığı təmin etməyə qadir olan hüquq-mühafizə orqanları var. Ən əsası isə Azərbaycanda artıq ciddi sınaqlardan çıxmış xalq-iqtidar birliyi mövcuddur. Elə ölkəmizdə sabitliyin əsasında da prezident İlham Əliyevin dediyi kimi, Azərbaycan xalqının iradəsi dayanır. Kim bu iradəyə qarşı çıxacaqsa, mütləq layiqli cəzasını alacaq. Çünki xalqımız bir daha ötən əsrin 90-cı illərinə, vətəndaş müharibəsinə, torpaqlarımızın itkisi ilə müşayiət olunan xaosa qayıtmaq istəmir və bunu əsla haqq etmir. Bu gün güclənən Azərbaycan heç vaxt indiki qədər öz ərazi bütövlüyünü bərpa etməyə yaxın olmayıb. Azərbaycan ordusu heç vaxt indiki qədər nizamlı, döyüş qabiliyyətli və indiki qədər həm texniki təchizat baxımından, həm döyüş hazırlığı baxımından düşmən ordusundan bu qədər üstün olmayıb. Xalqımızın düşmənlərini də narahat edən elə budur. Ona görə də ölkəmizdə yeni vətəndaş müharibəsi, yeni terror poliqonu yaratmağa çalışırlar. Ancaq Azərbaycan polisi bir daha sübut etdi ki, öz canı bahasına olsa belə, dövlət və millət qarşısında öz şərəfli vəzifəsini yerinə yetirməyə hazırdır”.

 

Millət vəkili vurğulayıb ki, iyulun 10-da radikal dini qruplara qarşı polisimizin qətiyyətli davranış nümayiş etdirməsi, cəmiyyətimizi xaosa sürükləməyə çalışan qaragüruhu qısa müddətdə zərərsizləşdirməyi bacarması antizərbaycançı mərkəzlərə verilən layiqli dərs olmaqla, hər bir Azərbaycan vətəndaşının da ürəyində fəxarət hissi yaradıb: “Hər bir vətəndaş bilir ki, onun təhlükəsizliyinin və asayişinin qorunmasını təmin edən hüquq-mühafizə orqanları var. Terroristlərin  istənilən cəhdi uğursuzluğa məhkumdur. Bu gün hər bir vətəndaşın tələbi və istəyi ondan ibarətdir ki, Azərbaycanı suriyalaşdırmaq istəyən radikallara qarşı ciddi mübarizə aparılsın və onlar ən ciddi şəkildə hüquq qarşısında cavab versinlər. Əks təqdirdə, cəzasızlıq mühiti yeni cinayətlərə şərait yarada bilər ki, bu da yenidən milli maraqlarımız və dövlətçiliyimiz üçün ciddi təhdidlər yaradar. Ona görə də hüquq-mühafizə orqanlarımız tərəddüd etmədən cinayətkar ünsürləri dərhal cəzalandırmalıdır. Bu, Azərbaycan cəmiyyətinin sosial sifarişi və tələbidir”.

 

Millət vəkili Elman Nəsirov APA-ya açıqlamasında bildirib ki, iyulun 10-də axşam saat 20 radələrində Gəncə İcra Hakimiyyətinin binası qarşısında baş verən iğtişaşlar bir həftə öncə, iyulun 3-də Gəncə Şəhər İcra Hakimiyyətinin başçısı Elmar Vəliyevə və polis əməkdaşına qarşı həyata keçirilən terror aktı ilə birbaşa bağlıdır və onun davamı kimi qiymətləndirilə bilər: “Hər iki halda hədəf Azərbaycan dövləti və dövlətçiliyi, Azərbaycandakı ictimai-siyasi sabitlik, təhlükəsizlik mühiti götürülüb. Məqsədləri Azərbaycanı xaos və anarxiyaya sürükləmək idi. Hadisələrin ilkin təhlili bu qənaətə gəlməyə əsas verir ki, bu terror aktları əvvəlcədən planlaşdırılıb, məqsədyönlü şəkildə həyata keçirilib. Onların minimum və maksimum planları olub. Bu radikal dini qruplaşmanın minimum planına Gəncədə itaətsizlik mühiti yaratmaq, vətəndaş həmrəyliyinin pozulmasına nail olmaq, ölkənin ikinci böyük şəhərində qanuni hakimiyyəti zorla qəsb etmək, Gəncəni özlərinin paytaxtı elan etmək daxil olub. Bunun ardınca domino effektinə nail olmaq, Azərbaycanın digər şəhər və rayonlarında da anoloji təxribatlar törədərək hakimiyyəti zəbt etmək, sonda isə ölkənin paytaxtında qarışıqlıq yaratmaq, vətəndaş itaətsizliyini təmin etmək, Bakıda terror aktları həyata keçirmək, hakimiyyəti zəbt etmək və beləliklə, ölkənin konstitusion quruluşunu devirərək şəriət əsasında idarə olunan dövləti yarandığını bəyan etmək olub. Bu radikal dini ünsürlər - burada söhbət 150-200 nəfərdən gedir - bu minimum və maksimum planın icraçılarıdır”.

 

E. Nəsirov qeyd edib ki, hər bir planın icraçıları olduğu kimi, onun təşkilatçıları da var: “Təşkilatçılar isə xaricdə olan ermənipərəst, erməni siyasi mərkəzlərindən idarə olunan qüvvələr, islamofob qüvvələrdir. Onlar heç bir vəchlə həzm edə bilmirlər ki, Azərbaycan sürətlə inkişaf edir, inkişaf etmiş dövlətlər sırasına daxil olmaq istəyir, islam həmrəyliyinin formalaşmasına töhfələr verir. Qəbul edə bilmirlər ki, Azərbaycan müsəlman aləmində bir sabitlik adasına çevrilib və bununla da islamofob qüvvələrin müsəlman dünyası haqqında mənfi imic formalaşdırmasına mane olur. Heç bir vəchlə qəbul edə bilmirlər ki, Azərbaycanda müxtəlif dinlərin, təriqətlərin, etnosların, mədəniyyətlərin daşıyıcıları bir ailə kimi yaşayırlar. Qəbul etmək istəmirlər ki, Azərbaycanda multikulturalizm bir həyat tərzidir, müxtəlif dinlərin bir ailə kimi yaşaması bir dövlət siyasətidir. Onların yuxusuna haram qatılır ki, Azərbaycanda multikulturalizm ictimai sifarişdir, xalqımız belə istəyir. Yuxularına o zaman haram qatılır ki, Azərbaycan prezidenti multikulturalizmə bizim zənginliyimiz, Azərbaycanın gələcəyinin təminatçısı kimi baxır. Bütün bunları həzm edə bilməyən qaragüruhçu qüvvələr ilk növbədə Azərbaycanın qədim şəhəri, qədim dövlətçilik ənənələri, Azərbaycan tarixində müstəsna yeri olan və fəxrlə yüz illiyini qeyd etdiyimiz Azərbaycan Xalq Cümhuriyyətinin ilk paytaxtı olan Gəncə şəhərində bu iğtişaşları törədərək, ictimai asayişi pozaraq Azərbaycanın digər ərazilərində domino effektinə nail olmaq istəyirdilər. Lakin onların bu niyyətləri gözündə qaldı, ünvanı səhv saldılar. Bəzi müsəlman ölkələrində belə ssenarilər baş tutsa da, Azərbaycanda baş tutması qeyri-mümkündür. Çünki o qüvvələr vaxtilə Azərbaycanı Livana, Bakını Beyruta çevirmək istəyirdilər. İndi həmin qüvvələr Bakını, Gəncəni Dəməşqə, Azərbaycanı Suriyaya çevirmək istəyirlər. Lakin bu, mümkün deyil. Çünki bunun üçün Azərbaycanda heç bir münbit şərait yoxdur. Azərbaycanda xalq-hakimiyyət birliyi var, xalq öz prezidentini birmənalı şəkildə dəstəkləyir. Aprelin 11-də keçirilən prezident seçkilərində bir daha Azərbaycan xalqı birmənalı olaraq prezidentə dəstəyini ifadə etdi. Azərbaycanda şəffaf, demokratik seçkilər nəticəsində İlham Əliyev yenidən prezident seçildi. Prezident də ayrı-ayrı beynəlxalq siyasi dairələrin, dövlətlərin diktəsi ilə deyil, məhz Azərbaycan dövlətinin, xalqının və millətinin mənafeyindən irəli gələn bir siyasət həyata keçirir. Bu siyasət müstəqil siyasətdir və bərabər hüquqa, qarşılıqlı hörmətə, bir-birinin daxili işlərinə qarışmamağa söykənən bir siyasətdir. Bu iğtişaşları törədən qaragüruhçu qüvvələr, dini radikal ünsürlər və onların təşkilatçıları heç bir bu halda bu reallığı həzm etmək istəmirdilər və ona görə də bu hadisələri törətməyə cəhd etdilər. Lakin Azərbaycan xalqı bu sınaqdan uğurla çıxdı. Bir daha məlum oldu ki, güclü xalq-hakimiyyət birliyi var. Xalq bu qüvvələrə “yox” dedi, qeyri-qanuni hərəkətlərinə öz etirazını bildirdi. Bu qaragüruhçu qüvvələr xalqın ciddi qınaq obyektinə çevrilib”. 

 

Millət vəkili Azərbaycan polisinin bu günlərdə çox böyük rəşadət göstərdiyini, qəhrəmanlıq səhifəsi yazdığını da vurğulayıb: “Gəncədə iki yüksək rütbəli polis zabiti qətlə yetirildi, onlar şəhidlik zirvəsinə yüksəldilər. Bir daha məlum oldu ki, bu dövlətimizin keşiyində dayanan Azərbaycan xalqı, Azərbaycan polisi, qəhrəman oğullarımız sabitliyimiz, təhlükəsizliyimiz naminə, dövlətçiliyimiz naminə öz canlarından keçməyə hazırdırlar. Bu günlərdə Azərbaycan xalqı bu sınaqdan daha bütöv, daha möhkəm, daha monolit çıxdı. Eyni zamanda, antimilli ünsürlərə, onların ağalarına, sifarişçilərinə çox ciddi ismarıc göndərildi ki, ünvanı səhv salmısınız, Azərbaycanda sizin qara niyyətlərinizi həyata keçirmək üçün heç bir münbit şərait olmayıb. Belə şərait bu gün də olmayıb, gələcəkdə də olmayacaq”. 

BÖLMƏDƏN DİGƏR XƏBƏRLƏR

XƏBƏR LENTİ

TOP 5

VİDEO XƏBƏRLƏR

FOTO XƏBƏRLƏR

  • azerbaycanda enerjisi techizati sahesinde yeni qaydalar mueyyen edilecek
    Azərbaycanda enerjisi təchizatı sahəsində yeni qaydalar müəy...
  • azerbaycanda istehsal ve ixrac potensiali olan mehsullar uzre melumat bazasi hazirlanacaq
    Azərbaycanda istehsal və ixrac potensialı olan məhsullar üzr...
azerbaycanda istehsal ve ixrac potensiali olan mehsullar uzre melumat bazasi hazirlanacaq azerbaycanda istehsal ve ixrac potensiali olan mehsullar uzre melumat bazasi hazirlanacaq +2
MƏZƏNNƏ
FOREX
/ 17 İyul, 2018

USD
1.7
 
EUR
1.9874
 
RR
0.0272