M. F. Axundov adına Milli Kitabxanada “Abdulla Şaiq. Biblioqrafiya” kitabının və “Abdulla Şaiq” elektron məlumat bazasının təqdimatı keçirilib.
APA-nın məlumatına görə, tədbirdə mədəniyyət və turizm nazirinin birinci müavini Vaqif Əliyev, Milli Kitabxananın direktoru Kərim Tahirov, F.Köçərli adına Respublika Uşaq Kitabxanasının direktoru Şəhla Qəmbərova iştirak edib, kitabın əhəmiyyətindən, Abdulla Şaiq irsinə olan diqqətdən danışıblar.
Vaqif Əliyev kitabın çap olunmasının əhəmiyyətini qeyd edərək bildirib ki, ədəbiyyat xadimlərinin irsinə olan qayğı və diqqət bundan sonra da davam edəcək. Nazir müavini əlavə edib ki, vəsait şairin keçdiyi dolğun həyat yolunu və zəngin yaradıcılığını əks etdirmək baxımından çox əhəmiyyətlidir.
Şəhla Qəmbərovanın sözlərinə görə, biblioqrafiyanın hazırlanmasına 2014-cü ildə başlanıb: “Elmi kitabxanaların fondlarından, Abdulla Şaiqin mənzil-muzeyinin eksponatlarından, faktlardan istifadə edilib. Kitabda 2000-dən çox mənbə göstərilib. Təqdim olunan 448 səhifəlik biblioqrafik topluda Abdulla Şaiqin 1906-2016-cı ilədək nəşr olunan əsərləri, həyat və yaradıcılığı haqqında materiallar əks olunub”.
Qeyd edək ki, kitab və elektron məlumat bazası Abdulla Şaiqin anadan olmasının 135 illiyi münasibətilə hazırlanıb.
Bizi Telegram-da izləyin
t.me/apa_az
Bizi Instagram-da izləyin
Bizi Facebook-da izləyin
Bizi Twitter-da izləyin
