Bakı – APA. “Oyun çox gərgin başladı. Hər iki komanda başabaş mübarizə apardı”. Apasport.az saytının məlumatına görə, bunu “Qarabağ”ın vitse-prezidenti Tahir Gözəl deyib.
Azərbaycan kubokunun finalında “Qəbələ” ilə qarşılaşan Ağdam təmsilçisi 2:0 hesablı qələbə qazanaraq, ölkə çempionluğundan sonra kuboku da başı üzərinə qaldırıb.
Naxçıvanda baş tutan matçdan sonra fikirlərini bildirən Gözəl sevincli olduğunu söyləyib: “Qarabağ”ı dəstəkləmək üçün bura gələn azarkeşlərimizi təbrik edirəm. Naxçıvan xalqının dəstəyi, ab-hava əla idi. Təşkilatçılığa görə Vasif Talıbova minnətdarlığımı bildirirəm. Əlbəttə ki, sevincliyik. Oyunun ikinci hissəsində temp yüksəldi. Komandamızın ikinci qolundan sonra rahatlaşdım. Hesab edirəm ki, “Qarabağ” bu gün tarix yazdı. Azərbaycanda ilk dəfədi ki, bir komanda ardıcıl 3 mövsüm “qızıl dubl” edir. Bu, böyük bir tarixdi, nailiyyətdi”.
Gələn mövsümlə bağlı hədəflərindən də söz açan klub rəhbəri məqsədlərinin Çempionlar Liqasının qrup mərhələsinə adlamaq olduğunu vurğulayıb: “Bundan sonrakı hədəf Çempionlar Liqasında uğurlu iştirakdı. Üç dəfə qapını döymüşük, alınmayıb. Həmişə də qapını döyəcəyik. Avropa qarşısında ciddi bir komanda görəcək. Baş məşqçimizə transfer seçimlərində uğurlar arzu edirəm. İnanıram ki, ən uğurlu oyunçuları seçəcək. Hədəfimiz Qarabağın adını idmanda sülhsevər kimi tanıtmaqdı”.
Bizi Telegram-da izləyin
t.me/apa_az
Bizi Instagram-da izləyin
Bizi Facebook-da izləyin
Bizi Twitter-da izləyin
