Birja

Ana səhifə

Birja

“InvestAZ”-dan dünya maliyyə bazarları ilə bağlı həftəlik analiz

17 iyul 2017 08:49 (UTC +04:00)

InvestAZ investisiya şirkətinin analitikləri bu həftə üzrə dünya maliyyə bazarlarında son vəziyyət və qısa müddət ərzində gözlənilənlərlə bağlı məlumat verib.

EUR

Foreks bazarlarında dolların təzyiq altında olması, EUR/USD məzənnəsinin 1.15$-a kimi bahalaşmasına təsir edib. Beləliklə, məzənnə 1.15$-ın üzərində möhkəmlənərsə, 1.17$-a kimi də bahalaşa bilər.

Maliyyə bazarlarında Amerika Mərkəzi Bankının (FED) faiz artımı fonunda gözləntilərin zəifləməsi, dolların aparıcı valyutalara nisbətən orta qiymətinin təqribən son 10 ayın minimum səviyyəsinə kimi ucuzlaşmasına səbəb olub.

Məzənnəyə güclü təsiri baxımından isə bu gün Bakı vaxtı ilə saat 13:00-da yayımlanacaq, Avrozonanın sonuncu inflyasiya səviyyəsi və cümə axşamı Avropa Mərkəzi Bankının monetar siyasəti ilə bağlı açıqlamaları, bu həftə investorların diqqət mərkəzində olan hadisələrdir.

GBP

GBP/USD valyuta cütlüyü qiyməti də 1.3113$-a kimi bahalaşmaqla, təqribən son 10 ayın maksimum səviyyəsini yeniləyib və 1.3292$-a kimi də bahalaşacağı proqnozlaşdırılır. Bununla yanaşı, maliyyə bazarlarında funtun gələcək trendi fonunda İngiltərə Mərkəzi Bankının gələcək monetar siyasəti ilə bağlı açıqlamaları və inflyasiya göstəriciləri də diqqət mərkəzindədir. Çərşənbə axşamı saat 12:30-da isə iyun ayı üzrə sonuncu inflyasiya səviyyəsi açıqlanacaqdır.

TRY

Türkiyə maliyyə bazarlarında Türk lirəsinin qiyməti keçən həftə 3% bahalaşıb və bu həftə 3.60TL-ə kimi korreksiya edəcəyi proqnozlaşdırılır. Bazar ertəsi Bakı vaxtı ilə saat 11:00-da açıqlanacaq, Türkiyədə işsizlik ilə bağlı yeni statistik rəqəmlərin də lirənin qiymətinə təsir edə biləcəyi gözlənilir.

OIL

Enerji bazarlarında isə Avropanın Brent markalı neftinin bir barel qiyməti 49$-a kimi dəyər qazanıb. Təhlillərə əsasən, Brent neftinin qiyməti qarşıdan gələn günlər ərzində sözügedən səviyyənin üzərində möhkəmlənməklə 49.77$ və 51.18$-a kimi də bahalaşa bilər.

Qeyd etmək lazımdır ki, Amerikada neft ehtiyatlarının azalması dinamikasının güclənməsi, neftə olan tələbin artmasına işarədir və neft qiymətlərinin bahalaşmasına təsir edir.

GOLD

Əlvan metallar bazarlarında qızıl qiymətləri gözlənildiyi kimi bahalaşmağa başlayıb. Artıq 1233$-a (39.6 $/qram) kimi dəyər qazanan qiymətli metalın bir unsiyası 1242$-a (39.9 $/qram) də kimi bahalaşacağı proqnozlaşdırılır.

İnvestisiya ilə bağlı suallarınızı *1234 telefon nömrəsi və www.investaz.az veb saytı vasitəsilə bizə ünvanlaya bilərsiniz.

“İnvest-AZ İnvestisiya Şirkəti” QSC-nin

Analitika Departamenti

“İnvest-AZ İnvestisiya Şirkəti” Qapalı Səhmdar Cəmiyyətinin fəaliyyəti Azərbaycan Respublikası Maliyyə Bazarlarına Nəzarət Palatası tərəfindən tənzimlənir. Şirkət, 09.01.2016-cı il tarixli 087986 saylı lisenziyası əsasında broker, anderraytinq (diler), marja ticarəti (forex), fərdi investorların portfelinin idarə edilməsi, market meykerlik və sair investisiya xidmətləri üzrə fəaliyyət göstərməkdədir.

_____________________________________________________________________________

Risk bildirişi.

Yuxarıda göstərilən məlumatlar tamamilə tövsiyə xarakterlidir. Bu fəaliyyət üzrə həyata keçirilən əməliyyatlar yüksək risk qrupuna daxildir və “İnvest-AZ İnvestisiya Şirkəti” QSC yuxarıda göstərilən məlumatlar əsas götürülməklə, həyata keçirilən investisiya əməliyyatları üzrə heç bir öhdəlik daşımır.