Yeni və köhnə Ramana qəsəbələrini birləşdirəcək yol inşa edilir

Yeni və köhnə Ramana qəsəbələrini birləşdirəcək yol inşa edilir
# 13 mart 2018 13:18 (UTC +04:00)

Vətəndaşların rahat gediş-gəlişini təmin etmək, yük və sərnişin daşımasını daha da asanlaşdırmaq istiqamətində, Azərbaycan Avtomobil Yolları Dövlət Agentliyi (AAY) mövcud yolların yenidən qurulması ilə paralel olaraq mümkün olan ərazilərdə yeni yolların inşasını da həyata keçirir.

Agentlikdən “Apa-Economics”ə verilən məlumata görə, ötən il bu çərçivədə Bakı şəhərində bir neçə layihə vətəndaşların istifadəsinə verilib. Qurumdan bildirilib ki, bu il də həmçinin belə layihələrin icrası nəzərdə tutulub.

“Onlardan biri Ramana-Maştağa yolu ilə “Ramana Qalası” Tarixi abidəni birləşdirən yeni avtomobil yoludur. Bu il icra olunan 63 kənd və qəsəbələrarası avtomobil yollarının tikintisi layihələri çərçivəsində inşa edilən yeni yolun uzunluğu 3,2 km, eni isə 6 metrdir. Uzun illərdir köhnə və yeni Ramana qəsəbələri arasında birbaşa yol bağlantısı olmayıb. Hər iki qəsəbənin 12 mindən artıq əhalisi gediş-gəliş kimi əlavə bir neçə km yol qət etməli olublar. Bu isə yük və sərnişin daşımasında xeyli problemlərə gətirib çıxarırdı. Yeni yolun inşası ilə sadalanan problemlərin birdəfəlik həlli hədəflənir”, - deyə agentlikdən bildirilib.

Tikinti layihəsinə uyğun olaraq əraziyə yararlı material daşınaraq 0,8 -1 metr hündürlükdə yeni yol yatağı inşa olunub. Daha sonra optimal qum-çınqıl qarışığından ibarət normativ qalınlıqda yol əsasının və yolun çiyinlərinin tikinti işləri aparılıb. Tikinti işlərinin növbəti mərhələsi kimi yola 2 qatılmaqla yeni asfalt-beton örtük döşənəcək. Belə ki, laylar arası əlaqələndirici bitum səpilməklə, 20 min kvadratmetrə yaxın sahədə yol örtüyünün alt layının iri dənəli, üst layına isə xırda dənəli asfalt-beton qarışığı ilə tikintisi işləri aparılacaq.

Yol boyu hərəkətin normal təşkili sonuncu mərhələdə üçün yol nişanları və məlumatverici lövhələr quraşdırılacaq, yolun üfüqi nişanlanma xətləri çəkiləcək. Bununla da qısa müddət ərzində yolun tam yeni və müasir şəkildə inşası yekunlaşdırılaraq hər iki qəsəbənin əhalisinin istifadəsinə verilməsi planlaşdırılır.

#
#

ƏMƏLİYYAT İCRA OLUNUR