Bu gün Dövlət Gömrük Komitəsinin sədri Səfər Mehdiyev Bakıda keçirilən Səlahiyyətli İqtisadi Operatorlar Beynəlxalq Assosiasiyasının Assambleyası və Konfransında iştirak etmək üçün ölkəmizdə səfərdə olan Uruqvay Gömrük İdarəsinin baş direktoru Enrike Kanonla görüşüb.
Komitədən "APA-Economics"ə verilən məlumata görə, S.Mehdiyev iki ölkənin gömrük orqanları arasında uzunmüddətli, səmimi və işgüzar əlaqələrin qurulduğunu vurğulayıb və əlaqələrin bundan sonra da davam etdiriləcəyinə əminliyini ifadə edib.
S. Mehdiyev ikitərəfli əlaqələrlə yanaşı, Ümumdünya Gömrük Təşkilatında da birgə fəaliyyətin səmərəsindən bəhs edib, münasibətlərin gələcək perspektivlərindən danışıb.
Azərbaycana artıq beşinci dəfə səfər etdiyini deyən E. Kanon ənənəvi qonaqpərvərliyə görə təşəkkürünü bildirib, həmçinin yeni vəzifəyə təyin olunması münasibətilə DGK sədri Səfər Mehdiyevi təbrik edib.
Ümumdünya Gömrük Təşkilatının bu ilin yayında keçiriləcək iclasında müzakirə ediləcək məsələlərə toxunan E. Kanon Kosovo və Dağlıq Qarabağ münaqişələri ilə bağlı Azərbaycanla eyni mövqedən çıxış etdiklərini, Azərbaycanın haqlı mövqeyini daim dəstəkləməyə hazır olduqlarını diqqətə çatdırıb.
Sonra görüşdə yaxın vaxtlarda Ümumdünya Gömrük Təşkilatında keçiriləcək seçkilərlə bağlı fikir mübadiləsi aparılıb.
Bizi Telegram-da izləyin
t.me/apa_az
Bizi Instagram-da izləyin
Bizi Facebook-da izləyin
Bizi Twitter-da izləyin
