Dövlət Sərhəd Xidməti (DSX) 15 iyun – Milli Qurtuluş gününün 25 illiyi ərəfəsində xidmətdə fərqlənmiş bir qrup sərhədçinin Böyük Qafqaz sıra dağlarının Qızılqaya massivində dəniz səviyyəsindən 3751 metr hündürlükdə yerləşən Heydər Əliyev zirvəsinə və Ağstafa rayonunun Keşikçi dağ ərazisində yerləşən İlham Əliyev zirvəsinə ənənəvi yürüşünü təşkil edib.
DSX-nin mətbuat mərkəzindən APA-ya bildirilib ki, Xudat sərhəd dəstəsinin “Xınalıq” sərhəd zastavasından və Şəmkir sərhəd dəstəsinin “Keşikçi dağ” sərhəd zastavasından hərəkətə başlayan yürüş iştirakçıları mürəkkəb relyefə malik olan dağlıq əraziləri fəth edərək, təyin olunmuş zirvələrə qalxıb. Orada bayraq ucaldılıb, dövlət himnini ifa olunub, ayalar üzərinə “Azərbaycan xalqının Milli Qurtuluş günü”nün 25 illik yubileyini tərənnüm edən lövhələr bərkidilib.