“Azərbaycan Avropa İttifaqının etibarlı və proqnozlaşdırılan tərəfdaşıdır”.
APA-nın xəbərinə görə, bunu Azərbaycanın Belçika Krallığındakı səfiri və Avropa İttifaqı yanındakı nümayəndəliyinin rəhbəri Fuad İsgəndərov Avropa Parlamenti tərəfindən Azərbaycanla bağlı qəbul edilən qətnaməyə münasibət bildirərkən deyib.
F. İsgəndərov bildirib ki, həmişə ikitərəfli əməkdaşlıqda müsbət dinamikaya üstünlük verilib: “İmzalanacaq yeni saziş qarşılıqlı faydalı əlaqələrimizi daha da artıracaq və hər iki tərəf üçün maraq doğuran bütün məsələlərə toxunacaq. Bu istiqamətdə danışıqlar davam etdirilir və tez bir zamanda işlərin yekunlaşacağına ümid edirik. Bunun üçün biz Aİ-Azərbaycan münasibətlərinin rifahını istəyən tərəflərdən bizim tərəfdaşlığımızı pozmağa yönəlmiş cəhdlərə qarşı mübarizədə dəstək gözləyirik. Qətnamə Azərbaycanın vacib tərəfdaş olduğunu bir daha vurğulayır və gələcək əməkdaşlıq üçün daha geniş imkanlar nəzərdə tutur”.
F. İsgəndərov qeyd edib ki, Azərbaycanın da Aİ ilə danışıqlara dair bəzi məsələlərdə ciddi “qırmızı xət”ləri var, amma heç vaxt onları danışıqlar üçün qeyd-şərt kimi irəli sürməyib: "Bizim Avropa Xarici Fəaliyyət Xidmətindəki tərəfdaşlarımız da eyni mövqedədir. Hər iki tərəf razılaşma üzrə danışıqların ikitərəfli əhəmiyyətini başa düşür və Aİ də sazişin imzalanmasında az maraqlı deyil. Danışıqları pozmaq üçün hər hansı bir cəhd uğursuz olacaq".
Bizi Telegram-da izləyin
t.me/apa_az
Bizi Instagram-da izləyin
Bizi Facebook-da izləyin
Bizi Twitter-da izləyin
