“12 iyul tarixində Azərbaycan nümayəndə heyəti Qara Dəniz İqtisadi Əməkdaşlıq Təşkilatının mənzil qərargahında Azərbaycanın sədrliyi ilə əlaqədar prioritetləri üzv dövlətlərin diqqətinə çatdıracaq”.
APA-nın xəbərinə görə, bunu XİN-in mətbuat xidmətinin rəhbəri Hikmət Hacıyev bu gün keçirdiyi mətbuat konfransında deyib.
H. Hacıyev bildirib ki, Azərbaycan sədrliyi dövründə üzv dövlətlər arasında əlaqələrin qurulmasına əsas önəm verəcək, nəqliyyat, turizm, enerji, informasiya-kommunikasiya kimi sahələrdə əməkdaşlığı təşviq edəcək: “Ermənistan tərəfindən guya “Azərbaycan QDİƏT-in gündəmini siyasiləşdirir” kimi bəyanatlar verilir, ancaq bunlar hamısı əsassızdır. Azərbaycan QDİƏT-ə üzv dövlətləri bu təşkilatın nizamnaməsinə, məqsədlərinə, həmçinin xarici işlər nazirləri şurasında qəbul edilmiş qərarlara riayət etməyə çağırır. QDİƏT-in məqsəd və məramları odur ki, Qara dəniz məkanında üzv dövlətlər arasında real regional əməkdaşlıq təşviq edilsin və inkişaf etdirilsin. Bir dövlət tərəfindən digər dövlətin torpaqlarının işğalı qəbul edilmir. Azərbaycan da ona görə bu kimi pozucu fəaliyyətləri ört-basdır etməyəcək, təşkilatın fəaliyyətinə mane olan hallar açıq şəkildə qeyd olunmalıdır”.
XİN təmsilçisi deyib ki, Azərbaycan beynəlxalq təşkilatlar çərçivəsində real regional əməkdaşlığı dəstəkləyir və sahəvi əməkdaşlığın tərəfdaşıdır.
Bizi Telegram-da izləyin
t.me/apa_az
Bizi Instagram-da izləyin
Bizi Facebook-da izləyin
Bizi Twitter-da izləyin
