Hadisə

Bakı. Etibar Məmmədov - APA. Bakı Ağır Cinayətlər Məhkəməsində “Azərbaycan Beynəlxalq Bankı” Açıq Səhmdar Cəmiyyətinin İdarə Heyətinin sabiq sədri Cahangir Hacıyev və onunla birlikdə təqsirləndirilən digər 7 nəfərin cinayət işi üzrə məhkəmə prosesi fasilədən sonra davam etdirilib.

APA-nın məlumatına görə, hakim Əfqan Hacıyevin sədrliyi ilə keçirilən prosesdə C. Hacıyevin vəkilləri çıxış edib.

Vəkil Fəxrəddin Mehdiyev bildirib ki, hüquqlarını müdafiə etdiyi şəxsə qarşı irəli sürülən ittiham qanunsuzdur: "Məsələyə Cinayət Məcəlləsinin tələbləri baxımından yanaşsaq, görərik ki, bu, mülki xarakterli işdir və mülki icraatda baxılmalıdır. Ona görə də bu cinayət işinə bəraətverici əsaslarla xitam verilməlidir. Bu iş üzrə ibtidai istintaq və məhkəmə istintaqı qərəzli aparılıb. Cinayət işi Emil Mustafayevin ərizəsi əsasında başlayıb”.

Vəkil qeyd edib ki, verilən kreditlərin hara xərcləndiyi məhkəmə tərəfindən obyektiv araşdırılmayıb: "Bu məsələ araşdırılmalıydı və ondan sonra bilinməliydi ki, nə mənimsənilib. Filal müdirlərini gətirib, onlara ittiham veriblər, amma kredit müqavilələrini imzalayan şəxsləri şahid kimi dindirirlər. Kreditlər layihələrə yönəldilib. Kreditlərin ayrıldığı daxili layihələrə Dünyamin Xəlilov, xarici layihələrə isə Xaqani Bəşirov rəhbərlik edib. Biz istintaqda onların dindirilməsini tələb etdik və bizə dedilər ki, Xaqani Bəşirov Fransa vətəndaşı olduğundan dindirmək qeyri-mümkündür. Cahangir Hacıyevə vəzifə saxtakarlığı ittihamı verilib. Hansı kağızları saxtalaşdırıb Cahangir Hacıyev? Bu, hələ də məlum deyil".

Vəkil çıxışında məhkəməyə təqdim olunan vəsatətlərdən heç birini təmin edilmədiyini, məhkəmə istintaqının natamam aparıldığını vurğulayıb. O, prokurorun təqsirləndirilən şəxslərə fantastik cəza istədiyini söyləyib, bunun reallığa uyğun olmadığını deyib.

C. Hacıyevin digər vəkili A. Layicov da çıxış edərək hüquqlarını müdafiə etdiyi şəxsin günahsız olduğunu iddia edib: "Dəymiş ziyanla bağlı gündə bir rəqəm açıqlanır. Dəfələrlə bəzi şəxslərin dindirilməsi haqında vəsatət qaldırmışıq, amma təmin olunmayıb. Necə olur ki, istintaqçılar burada qrup yaradıb Zamirə Hacıyevanın arxasınca gedirlər, amma Xaqani Bəşirovu istintaqa cəlb edə bilmirsiniz?”

Vəkil məhkəmədən Cahangir Hacıyevə bəraət verilməsini xahiş edib.

Digər təqsirləndirilən şəxslərin vəkilləri də çıxış edərək, hüquqlarını müdafiə etdikləri şəxslərin günahsız olduğunu və onlara bəraət verilməsini istəyiblər.

Proses oktyabrın 5-də davam etdiriləcək.

***

14:09

Bakı. Etibar Məmmədov - APA. Bakı Ağır Cinayətlər Məhkəməsində “Azərbaycan Beynəlxalq Bankı” Açıq Səhmdar Cəmiyyətinin İdarə Heyətinin sabiq sədri Cahangir Hacıyev və onunla birlikdə təqsirləndirilən digər 7 nəfərin cinayət işi üzrə məhkəmə prosesi keçirilib.

APA-nın məlumatına görə, hakim Əfqan Hacıyevin sədrliyi ilə keçirilən prosesdə zərərçəkmiş - "Aqrar Kredit" QSC-nin nümayəndəsi təqsirləndirilən şəxslərdən 7 milyon 624 min manat tutulmasını istəyib.

Sonra C. Hacıyevin vəkili Fəxrəddin Mehdiyev müdafiə çıxışı edib. Vəkil məhkəmədən C. Hacıyevə bəraət verilməsini istəyib.

Məhkəmə prosesi fasilədən sonra davam etdiriləcək.

Qeyd edək ki, C. Hacıyev, Beynəlxalq Bankın Mərkəzi filialının direktoru vəzifəsində işləmiş Anar Sultanov, bankın Mərkəzi filialın müdiri işləmiş İlqar Abdullayev, “İnter Security” MMC-nin direktoru işləmiş İbrahim Hüseynov, Mərkəzi filialın direktoru işləmiş Yusif Ələkbərov, bankın Nəqliyyat filialının direktoru işləmiş Kənan Orucov, bankın Nərimanov filialının direktoru işləmiş, hazırda AFB Bankın sədri olan Məmməd Cahangirov və Bakı Fındıq Zavodunun direktoru işləmiş Azad Cavadov Cinayət Məcəlləsinin 179.3.1, 179.3.2 (mütəşəkkil dəstə tərəfindən külli miqdarda mənimsəmə), 308.2 (vəzifə səlahiyyətlərindən sui-istifadə ağır nəticələrə səbəb olduqda), 309.2 (vəzifə səlahiyyətlərini aşma ağır nəticələrə səbəb olduqda), 313-cü (vəzifə saxtakarlığı), 228.1 və 228.4-cü (qanunsuz olaraq silah, onun komplekt hissələrini, döyüş sursatı, partlayıcı maddələr və qurğular əldə etmə, başqasına vermə, satma, saxlama, daşıma və gəzdirmə) maddələri ilə ittiham olunur.