ABŞ prezidenti İranın raket hücumuna görə əvvəlki administrasiyanı günahlandırıb

ABŞ prezidenti İranın raket hücumuna görə əvvəlki administrasiyanı günahlandırıb
  • Clock-gray 01:28
  • calendar-gray 09 Yanvar 2020

“Ötən gecə bizə və bizim müttəfiqlərimizə atılan raketlər əvvəlki administrasiyanın yaratdığı maliyyə imkanları hesabına əldə edilib”. 

APA-nın məlumatına görə, prezident Donald Tramp bu gün keçirdiyi mətbuat konfransında İranın İraqdakı ABŞ hərbi bazalarına raket zərbələri endirməsindən sonra xalqa müraciətində belə deyib. 

İranla imzalanan nüvə razılaşmasının “axmaq saziş” olduğunu deyən Tramp bildirib ki, bu razılaşma İrana küllü miqdarda maliyyə vəsaiti əldə etmək imkanı verib və bu vəsait Yaxın Şərqdə terrorçuluğun dəstəklənməsinə yönəldilib.

“Təkcə son aylarda İran beynəlxalq sularda üzən və onun üçün heç bir təhlükə yaratmayan gəmiyə, həmçinin Səudiyyə Ərəbistanına hücumlar təşkil edib, ABŞ-ın iki dronunu vurub. İranın ədavəti  2013-ci ildə axmaq nüvə razılaşması imzalandıqdan sonra əhəmiyyətli dərəcədə artıb və onlar 150 milyard dollar məbləğində nəqd, ümumilikdə isə 180 milyard dollar gəlir əldə ediblər. ABŞ-a təşəkkür etmək əvəzinə, ölüm şüarları səsləndiriblər”, - deyə D. Tramp bildirib. 

ABŞ prezidenti əlavə edib ki, İran razılaşmadan əldə etdiyi maddi vəsaitlə terrorizmə dəstək verib, Yəməndə, Suriyada, Livanda, Əfqanıstanda, İraqda cəhənnəm yaradıb: “Rejim hətta bu yaxınlarda İranın müxtəlif yerlərində keçirilən etiraz aksiyalarında 1500 insanı da öldürərək öz hakimiyyətini möhkəmləndirib. İran nüvə ambisiyalarından əl çəkməli, terrorizmə dəstəyə son qoymalıdır. Böyük Britaniya, Fransa, Almaniya, Rusiya və Çinin bu reallığı qəbul etməsinin vaxtı çatıb”.

Səid Babazadə

Digər xəbərlər