Xəbərlər

Azərbaycanda süni mayalanmaya üz tutanların sayı ildən ilə artır. 18 ildir ki, ölkəmizdə tətbiq edilən süni mayalanma nəticəsində bir çox ailələr övlad sevinci yaşayıb. Bu proses necə aparılır? Valideyn olmaq istəyənlər hansı prosedurlardan keçirlər? Suallarımızı cərrah-ginekoloq Sərdar Çelik cavablandırdı:

“Sperma hüceyrəsi ilə yumurtalıq hüceyrəsinin təbii yoldan birləşə bilmədiyi  zaman edilən bir prosesdir bu. Məsələn qadının  boruları bağlıdırsa təbii ki, sperma və yumurta hüceyrəsi birləşə bilmədiyindən biz onu laboratoriya şəraitində birləşdiririk və xəstənin uşaqlığına köçürürük. Bütün analizlərdən keçdikdən sonra müalicəyə başlayırıq. Borusunda problemi ,mikrobu varsa düzəldirik. Süni mayalanma müalicəsinin müddəti xəstədən xəstəyə dəyişə bilir. Müalicəsi 15 gündə bitən xəstələrimiz də var 2 ay müddəti çəkən xəstələr də var. Xəstədə hər şey qaydasında gedirsə xəstənin müalicəsi 10-15 gün içərisində bitir”.

Proseslə tanış olduqdan sonra qiymətlərlə maraqlandıq. Qiymətlər klinikaya görə dəyişir. Çəkiliş apardığımız klinakada süni mayalanmanın qiyməti 3700 manatdır. Bəzi müayinələr müalicəvi məqsədlə yazılan dərmanlar, embrionun dondurulması, paketə daxil olmayan analizlər məbləğə daxil deyil. Bəs qiymətin bu qədər yüksək olmasının, klinikaya nəzərən dəyişməsinin səbəbi nədir?

Səhiyyə Nazirliyinin baş mama-ginekoloqu Sevinc Məmmədovanın  sözlərinə görə, süni mayalanmanın qiymətinin hər klinikada fərqli olması dərmanların qiymətindən asılıdır.

“Süni mayalanma zamanı müəyyən bahalı müayinələrdən, müalicə üsullarından, dərmanlardan istifadə edilir. Bu dərmanların istehsalından, istehsalçı qiymətindən asılı olaraq Azərbaycana gətiriləndə də bunlar müxtəlif qiymətlərdə klinikalar tərəfindən alınır və xəstəyə tətbiq olunur. Bu səbəbdən də qiymətlər müxtəlifdir. Elə klinikalar var ki türk dərmanları, elə klinikalar var ki Avropa istehsalı dərmanları istifadə edirlər bu da qiymətə təsir edir”.

Mütəxəssislərin sözlərinə görə, yaş artdıqca əməliyyatın qiyməti də, dərmanların sayı da artır. Qiymət həm də, qadının orqanizmindən və cütlüyün hüceyrələrinin sağlamlığından asılıdır.

Ümumi hesabladıqda isə bəlli olur ki, süni mayalanma üsulu ilə valideyn olmaq istəyənlərin təxminən 5 min manat xərcləri çıxır.

• Zaxarovadan Paşinyanın “Qarabağ Azərbaycanındır” fikrinə münasibət
• Tibb işçiləri arasında kütləvi zəhərlənmə olub
• Prezident və birinci xanım Xocalı soyqırımı abidəsini ziyarət ediblər