Zəfər gününə həsr olunan pyes təqdim olundu

# 23:39
8 noyabr 2021

8 Noyabr - Zəfər Günündə Azərbaycan Dövlət Akademik Musiqili Teatrında qəhrəmanlıq salnaməmizi özündə əks etdirən Samir Qulamovun "Bir nəfəs qədər" pyesinin premyerası olub.

 

APA TV xəbər verir ki, Səbail Rayon İcra Hakimiyyəti və Akademik Musiqili Teatrının birgə təşkil etdiyi bayram tədbirində icra başçısı Vüqar Zeynalov xalqımızın bir il bundan öncəki böyük və tarixi qələbəsindən danışıb, tədbirə toplaşan şəhid ailələrinə, qazi və əsgərlərimizə bu böyük Zəfərin həyatımızdakı misilsiz rolundan söz açıb. Bu qələbədə Müzəffər Ali Baş Komandanımızın, onun ətrafında dəmir yumruq kimi birləşən hər bir Azərbaycan vətəndaşının nə qədər böyük zəhmətinin olduğunu qeyd edib.

 

Rayon ərazisində yaşayan əsgər və şəhid ailələrinə göstərilən qayğıdan söhbət açan icra başçısı bu işlərin bundan sonra da davamlı olaraq görüləcəyini vurğulayıb. Sonra isə Akademik Musiqili Teatrının aktyorlarının ifasında Samir Qulamovun “Bir nəfəs qədər” tamaşasının premyerası təqdim olunub.

 

Əsərin ideya müəllifi ve bədii rəhbəri Əməkdar incəsənət xadimi, fəlsəfə doktoru Əliqismət Lalayevdir. SSRİ Xalq artisti Fikrət Əmirovun musiqisi əsasında hazırlanan səhnə əsərinin quruluşçu rejissoru Samir Qulamov, quruluşçu dirijoru və musiqi tərtibatçısı Əməkdar incəsənət xadimi Fəxrəddin Atayev, quruluşçu rəssamı Vüsal Rəhim, quruluşçu baletmeysterləri Əməkdar artistlər Zakir və Leyla Ağayevlər, konsertmeyster Kamil Həsənov, rejissor assistentləri Sevinc Məmmədova və Əmrah Dadaşovdur.

 

Nərmin Murad

Əli Ələkbər

APA TV

#
#

ƏMƏLİYYAT İCRA OLUNUR