Azərbaycanın 3 ərazisi Qlobal Əhəmiyyətli Aqrar İrs Sistemi kimi qeydiyyata salınacaq

Azərbaycanın 3 ərazisi Qlobal Əhəmiyyətli Aqrar İrs Sistemi kimi qeydiyyata salınacaq
  • Clock-gray 13:06
  • calendar-gray 04 Fevral 2021

Azərbaycanın Şimal-Qərb bölgəsində 3 ərazi Qlobal Əhəmiyyətli Aqrar İrs Sistemi (GIAHS) kimi qeydə alınacaq.

BMT Ərzaq və Kənd Təsərrüfatı Təşkilatından (FAO) “APA-Economics”ə verilən məlumata görə, Avropa İttifaqının maliyyə dəstəyi ilə FAO-nun həyata keçirdiyi “Azərbaycanın Şimal-Qərb bölgəsində dayanıqlı və inklüziv yerli kənd təsərrüfatı və qida sistemlərinin inkişaf etdirilməsi” Layihəsi çərçivəsində bölgədə GIAHS tələblərinə cavab verən məntəqələr seçiləcək.

Qlobal Əhəmiyyətli Kənd Təsərrüfatı İrsi Sistemləri kənd təsərrüfatı biomüxtəlifliyini, möhkəm ekosistemi və dəyərli mədəni irsi birləşdirən mənzərəli məkanlardır. İqlim dəyişikliyinə tab gətirən bu ərazilərdə ənənəvi kənd təsərrüfatı təcrübələri sayəsində aqrar biomüxtəlifliyi qoruyan dayanıqlı ekosistemlər formalaşıb. GIAHS ərazisi kimi qeydə alınmaq bölgənin hazırkı və gələcək qida təhlükəsizliyi, əhalinin dolanışıq vəziyyətinin təminatı, eləcə də digər iqtisadi və ətraf mühit məhsul və xidmətlərinin inkişafı üçün böyük əhəmiyyətə malikdir.

Zaqatala, Qax, Balakən rayonlarını əhatə edən layihənin əsas məqsədi kiçik kənd təsərrüfatı sahibkarlığını dəstəkləyən dəyər zəncirlərinin formalaşdırılması və ərazidə yoxsulluğun aradan qaldırılmasına töhfə verməkdir. Bölgənin aqrar turizm potensialının inkişafı da Layihənin hədəfindədir.

Bölgədə seçilmiş ərazilərin GIAHS kimi qeydiyyata düşməsi nəinki həmin məkanların, ümumilikdə Azərbaycanın xarici turistlərə tanıdılması üçün əhəmiyyətli addım olacaq. “GIAHS qismində FAO tərəfindən qeydiyyata alınan ərazilər və icmaların üstünlüyü ondadır ki, həmin ərazilərdə yaşayan və fəaliyyət göstərən fermer və emalçıların istehsal etdiyi məhsullar qlobal miqyasda tanınmaqla bərabər, bu icmalara xarici turistlərin səfər etməsi, aqrar turizmin inkişafı üçün münbit şərait yaranır”, - deyə layihə rəhbəri Yusif Axundov bildirib.

Hüseyn Vəliyev

Digər xəbərlər