“Əl-Həşd aş-Şaabi” tərəfdarlarını ABŞ-ın Bağdaddakı səfirliyi qarşısında aksiyanı dayandırmağa çağırıb

“Əl-Həşd aş-Şaabi” tərəfdarlarını ABŞ-ın Bağdaddakı səfirliyi qarşısında aksiyanı dayandırmağa çağırıb
  • Clock-gray 18:06
  • calendar-gray 01 Yanvar 2020

İraqda qanuni silahlı birləşmə kimi tanınan “Əl-Həşd aş-Şaabi” könüllü şiə qruplaşması tərəfdarlarını ABŞ-ın Bağdaddakı səfirliyi qarşısında aksiyanı dayandırmağa çağırıb.

APA-nın “Anadolu” agentliyinə istinadən verdiyi məlumata görə, “Əl-Həşd aş-Şaabi” İraq hökumətinin çağırışına hörmətlə yanaşaraq və dövlət qurumlarının qorunması naminə kütləni ABŞ səfirliyi qarşısından geri çəkilməyə çağırıb.

Eyni zamanda “Əl-Həşd aş-Şaabi” ABŞ-ın "Xətaib Hizbullah" qruplaşmasının bazasına aviazərbə endirməsini pislədikləri üçün İraq Baş Naziri Adil Əbdülmehdi, o cümlədən siyasi və dini liderlərə təşəkkür edib.

Xatırladaq ki, dünən İraq hökuməti aksiyaçıları ABŞ səfirliyi qarşısından çəkilməyə çağırıb.

Qeyd edək ki, ABŞ Kərkük yaxınlığındakı bazasına raket zərbəsi nəticəsində bir amerikalı hərbçinin ölməsinə cavab olaraq dekabrın 29-da "Hizbullah"ın İraqdakı qolu olan "Xətaib Hizbullah" qruplaşmasının Əl-Kaim şəhəri yaxınlığındakı bazasını bombalayıb. Qırıcı təyyarələrdən endirilən zərbə nəticəsində İraqda qanuni silahlı birləşmə kimi tanınan “Əl-Həşd aş-Şaabi” könüllü şiə qruplaşmasının tərkibində yer alan "Xətaib Hizbullah"ın ən azı 25 döyüşçüsü öldürülüb, 55 nəfər yaralanıb. Ölənlərin arasında qruplaşmanın dörd komandiri də var.

Dünən ABŞ-ın Bağdaddakı səfirliyi qarşısında etiraz aksiyası başlayıb. Aksiyanın gedişində səfirlik boşaldılıb. “Əl-Həşd aş-Şaabi” könüllü şiə qruplaşmasının yüzlərlə tərəfdarı ABŞ səfirliyinin ərazisinə daxil olub, səfirliyin əsas giriş qapısını və səfirliyi əhatə edən divarları yandırıblar. Səfirliyin mühafizə xidmətinin əməkdaşları və polis aksiyaçılara qarşı gözyaşardıcı qaz tətbiq edib, havaya atəş açıblar. Nəticədə 20 nəfər xəsarət alıb.

Dünən ABŞ Prezidenti Donald Tramp İraq səfirliyinə hücuma görə İranı ittiham edib. Bu gün isə D. Tramp İranla silahlı münaqişə istəmədiyini bəyan edib.

apa-logo-mini

Digər xəbərlər