Filippinin Sulu əyalətində polis əməkdaşları “Əbu Sayyaf” terror qruplaşmasının terrorçu-kamikadzelərinin ələ keçirilməsi ilə bağlı əməliyyat keçirən dörd hərbi qulluqçunu güllələyib.
APA xəbər verir ki, bu barədə yerli “Manila Bulletin” qəzeti məlumat yayıb.
Nəşr bildirir ki, polisin güllələdiyi dörd silahlı şəxs Holo şəhərində əməliyyat icra edən hərbçilər olub. Müəyyən edilib ki, onlar ordunun kəşfiyyat bölməsinin üzvləri olub və məxfi əməliyyat çərçivəsində “Əbu Sayyaf”ın bomba hazırlamaqla məşğul olan üzvü Mundi Savacaanla əlbir olan terrorçu-kamikadzeləri müəyyən etməli imişlər.
Polisin məlumatına görə, Holo bələdiyyəsinin polis əməkdaşları və narkotiklərlə mübarizə bölməsinin nümayəndələri Sulu əyalətində avtomobil görüblər. Onlar avtomobilə yaxınlaşanda oradakılar özlərini Filippin hərbi qüvvələrinin əməkdaşları kimi təqdim ediblər. Bununla belə, yoxlama aparılması üçün onlara polis bölməsinə gəlmək tapşırılıb.
Ancaq yolda hərbçilər ərazidən yayınmaq istəyiblər və əllərində olan silahdan polisə atəş açıblar. Polis bildirir ki, hərbçilərə qarşı odlu silahdan özünümüdafiə üçün istifadə edilib. Nəticədə dörd silahlı şəxs öldürülüb.
Ordunun rəsmi nümayəndəsi Sirilito Sobehananın sözlərinə görə, hərbçilər rəsmi funksiya icra ediblər və səhvən cinayət ünsürləri hesab olunublar. Hazırda faktın təfərrüatlarını aydınlaşdırmaq üçün milli araşdırma bürosuna müraciət olunub.
Bizi Telegram-da izləyin
t.me/apa_az
Bizi Instagram-da izləyin
Bizi Facebook-da izləyin
Bizi Twitter-da izləyin
