İsrailin müdafiə naziri Benni Qantz ölkəsinin Fələstin Administrasiyasını dəstəkləmək və fələstinlilərin gündəlik həyatını asanlaşdırmaq üçün bir sıra addımlar atacağını açıqlayıb.
APA-nın “Times of Israel”ə istinadən verdiyi xəbərə görə, bu barədə açıqlama dekabrın 28-də Fələstin Muxtariyyətinin prezidenti Mahmud Abbasla Benni Qantz arasında baş tutan görüşdən sonra verilib.
Bildirilib ki, Fələstin Muxtariyyətinin gedərək artan büdcə kəsirini azaltmaq üçün İsrailin Ramallah adından topladığı vergi gəlirləri əsasında Fələstinə 32,2 milyon dollar kredit veriləcək.
B. Qantz deyib ki, İsrail həmçinin İordan çayının qərb sahilində və Qəzzada yaşayan 9 500 sənədsiz fələstinli və əcnəbi vətəndaşın statusunu qanuniləşdirəcək.
Başqa bir İsrail rəsmisinin sözlərinə görə, Benni Qantz Mahmud Abbasla görüşdə bildirib ki, yanacaq ödənişlərinin azaldılması və gəmi konteynerlərinin Allenbi körpüsü vasitəsilə İordaniyadan Qərb Sahilinə daxil olmasına icazə verən pilot proqram da daxil olmaqla, bir sıra iqtisadi tədbirlər nəzərdən keçirilir.
Xatırladaq ki, dekabrın 28-də Fələstin Muxtariyyətinin lideri Mahmud Abbas İsrailin müdafiə naziri Benni Qantzla görüşüb. Görüş Benni Qantzın Tel-Əviv yaxınlığındakı Roş Haayində yerləşən evində baş tutub. 10 ildən artıq müddətdən sonra ilk dəfə idi ki, Mahmud Abbas yüksək rütbəli İsrail rəsmisi ilə İsraildə görüşüb.
Bizi Telegram-da izləyin
t.me/apa_az
Bizi Instagram-da izləyin
Bizi Facebook-da izləyin
Bizi Twitter-da izləyin
