Deputat: "Paris kimi böyük bir şəhər meriyasının maraqları bir qrup erməninin girovuna çevrilməməlidir"

Deputat: "Paris kimi böyük bir şəhər meriyasının maraqları bir qrup erməninin girovuna çevrilməməlidir"
  • Clock-gray 18:05
  • calendar-gray 17 Noyabr 2020

“Paris meriyasının artıq mövcud olmayan hansısa Dağlıq Qarabağ adlı nəyi isə tanımaq həvəsinə düşməsi gecikmiş və puç olmuş siyasi romantizmdən başqa bir şey deyil”.

Bunu APA-ya açıqlamasında Milli Məclisin deputatı Hikmət Babaoğlu deyib.

O bildirib ki, kimlərəsə yeni avtoritar populizm lazımdır və konkret halda Fransa paytaxtının meri Enn İdalqo bununla məşğuldur: “Əslində, onu bu cür qeyri-qanuni addımlara təşviq edən də erməni lobbisi və Fransada olan ermənipərəstlərdir. Biz bilirik ki, Paris Şurası 163 nəfərdən ibarətdir. Şura şəhər merini və onun 40 müavinini seçir. Hazırda isə Fransa prezidenti Emmanuel Makronun yaratdığı və rəhbərlik etdiyi “İrəli Fransa” partiyası Şurada geniş şəkildə təmsil olunur. Ona görə də belə düşünməyə əsasımız var ki, bu məsələ sadəcə Paris meriyasının deyil, həm də sentyabr ayının 27-dən bəri Azərbaycanın beynəlxalq hüquqa söykənən haqq işinə qarşı təxribatçı fikirlər səsləndirən bəzi fransız rəsmilərin də təşəbbüsüdür. Bundan başqa mer Enn İdalqonun Fransa erməniləri ilə sıx əlaqələri var. Hətta onun müavinlərindən biri erməni əsilli Anuş Toronyandır. Anuş Toronyan isə Fransa ermənilərinin təşkilatı CCAF-ın rəhbəri Ara Toronyanın qızıdır. Bu fakt özlüyündə Paris meriyasının atmaq istədiyi qeyri-qanuni addımın kökündə nələrin dayandığını yaxşı izah edir. Ancaq bu da məsələnin hamısı deyil. Hələ 2015-2018-ci illərdə Parisin meri Enn İdalqo Ermənistan prezidenti Serj Sarqsyanla 4 dəfə görüşüb. Enn İdalqo Ermənistanda yaradılmış TUMO Center for Creative Technologies mərkəzinin Paris bölməsinin açılışında iştirak edib və hərtərəfli dəstək göstərib. TUMO-nun Xankəndidə də ofisi olub. Bütün bunlar erməni lobbisinin davamlı səyləri nəticəsində baş tutub. Ona görə də Paris meriyası hazırda belə spekulyativ hərəkətlər edir. Ancaq Paris kimi böyük bir şəhər meriyasının maraqları, ya da elə fransız xalqının maraqları bir qrup erməninin girovuna çevrilə bilməz,  çevrilməməlidir. Bu təşəbbüsə dəstək verənlər sonda ya peşman olmağa, ya da geri addım atmağa məhkumdurlar".

apa-logo-mini

Digər xəbərlər