®Rauf Arifoğlu Zeytun küçəsinin sakinləri ilə görüş keçirib

 ®Rauf Arifoğlu Zeytun küçəsinin sakinləri ilə görüş keçirib
# 24 yanvar 2020 11:50 (UTC +04:00)

Yanvar ayının 23-də seçkiqabağı təşviqat kampaniyası çərçivəsində 35 saylı Xətai üçüncü seçki dairəsindən millət vəkilliyinə namizəd Rauf Arifoğlu Zeytun küçəsində sakinlərlə görüş keçirib.

Rauf Arifoğlu seçki ərəfəsində bu cür görüşlərin əhəmiyyətini vurğulayıb və soyuq havada onu tək qoymadıqları üçün vətəndaşlara minnətdarlığını bildirib. Bölgənin çətin və mürəkkəb şəraitdə olduğunu, problemlərin çoxluğunu vurğulayan namizəd artıq bir çox məsələlərin media vasitəsilə işıqlandırıldığını və həllini tapdığını deyib. Əlavə edib ki, bu bir ayda görülən işlər qədər son 10 ildə problem həll olunmayıb.

“Biz bölgəyə gələn kimi, yazdıq, işıqlandırdıq, dövlət qurumlarını səfərbər etdik. Dövlətin bu bölgəyə böyük sərmayəsi gəlir” - deyən Arifoğlunun fikrincə, bölgədən elə bir millət vəkili seçilməlidir ki, o vəsaitlərin itib batmasına, yeyilməsinə imkan verməsin.

Namizədin sözlərinə görə, problemlərin sürətli həlli imkan verəcək ki, artıq növbəti illərdə sosial problemləri yox, dövlət səviyyəsində olan, ölkə miqyasında problemlərdən danışaq, onların həlli istiqamətində işləyək.

R.Arifoğlu onu da diqqətə çatdırıb ki, vətəndaşların dəstəyi ilə seçilərsə pensiya yaşının aşağı salınmasını, uşaqpulunun bərpasını, doğuma görə birdəfəlik müavinətin artırılmasını Milli Məclisdə qaldıracaq. Çünki ailələrdə doğulan uşaqların sayı azalır, bunun qarşısını almaq üçün də uşaqlara yönəlik layihələr olmalıdır.

Qazın limitinin aradan qaldırılması, elektrik limitinin ləğv olunması ilə bağlı danışan R.Arifoğlu enerji istehsalçısı olan Azərbaycanda bu məsələlərin həll edilməsini zəruri sayıb. O, gənc nəslin sağlam böyüməsi üçün Abad həyət layihəsinin bütün qəsəbələrə gəlməsinin zəruri olduğunu qeyd edib.

Bundan başqa, pulsuz təhsil, aztəminatlı ailələrin istedadlı uşaqlarının inkişafına dəstək, müəllimlərin maaşının artırılması da R.Arifoğlunun platformasında bir nömrəli məsələdir.

R.Arifoğlu həmçinin Milli Məclisdə səhiyyədə icbari sığorta məsələsini, xərçəng, şəkərli diabet, vərəm xəstələrinin pulsuz müalicəsinin reallaşmasını da qaldıracağını deyib.

Görüş sakinlərin şəxsi və məhəllə səviyyəsində problemlərinin namizədə çatdırılması ilə davam edib.

#
#

ƏMƏLİYYAT İCRA OLUNUR