Əli Əhmədov: “Əminəm ki, Aprel döyüşlərindən sonra düşmənin yuxusu qaçıb, özünə gələ bilmir”

Əli Əhmədov: “Əminəm ki, Aprel döyüşlərindən sonra düşmənin yuxusu qaçıb, özünə gələ bilmir”
  • Clock-gray 15:13
  • calendar-gray 25 İyun 2019

“Sabah Silahlı Qüvvələr günüdür. Azərbaycanın hər bir vətəndaşı haqlı olaraq fəxr edə bilər ki, qüdrətli, möhtəşəm silahlı qüvvələrimiz var. Məlum Aprel döyüşləri ordumuzun statusunu qəti olaraq təsdiq etdi. Əsgərlərimiz, zabitlərimiz, generallarımız Ali Baş Komandanın əmri ilə istənilən döyüş vəzifəsini, ən başlıcası isə torpaqlarımızın azad olunması vəzifəsini yerinə yetirməyə hazır olduğunu bütün dünyaya nümayiş etdirdi. Əminəm ki, Aprel döyüşlərindən sonra düşmənin yuxusu qaçıb, sakitləşib özünə gələ bilmir”.

APA-nın xəbərinə görə, bunu baş nazirin müavini, YAP-ın icra katibi Əli Əhmədov özünün “facebook” səhifəsində yazıb.

Baş nazirin müavini bildirib ki, xüsusi qürur verən cəhət Azərbaycanın silahlı qüvvələrinin döyüş qüdrətinə və təchizatına görə dünyanın ən güclü orduları sırasında olmasıdır: “Əhalisinin sayına görə dünyada 89-cu yerdə olan ölkəmiz ordumuzun qüdrətinə görə 52-ci yerdə durur. Quruculuğu ümummilli lider Heydər Əliyevin müstəqil dövlətçilik strategiyasının reallaşması dövründən başlayan möhtəşəm Azərbaycan Ordusu Prezident İlham Əliyevin rəhbərliyi altında sözün həqiqi mənasında dünyanın qüdrətli silahlı qüvvələri sırasında özünə layiqli yer tutub”.

Ə. Əhmədov qeyd edib ki, Ordu günündə keçmişə ekskurs edib 1992-1993-cü illərdə silahlı qüvvələr sahəsindəki anarxiyanı yada salmamaq mümkün deyil: “Erməni silahlı qüvvələrinin Azərbaycana təcavüzü ilə başlanan müharibə şəraitində AXC-Müsavat hökumətinin orduya rəhbərliyi hərbdən xəbəri olmayan avantürist birinə həvalə etməsi xəyanət və cinayətdən başqa bir şey deyil. Bundan heç də geridə qalmayan xəyanət və cinayət o idi ki, cəbhədə torpaqlarımıza təcavüz edən düşmənə çevrilməli olan silahların xeyli hissəsi Bakıda, Gəncədə, digər yerlərdə insanları vahimə altında saxlamaq üçün mülki insanlara paylanmışdı. Daha bir xəyanət və cinayət isə o idi ki, ayrı-ayrı partiyalara və qruplara xidmət göstərən silahlı dəstələr yaradılmasına dövlət səviyyəsində imkan verilmişdi. Nəticədə güclü nizami ordu yaradılması baş tutmamışdı, torpaqlarımızın müdafiəsi lazımınca təşkil olunmamışdı. Mən könüllü batalyonlarda vuruşan, ümumiyyətlə vətənin bütövlüyü yolunda böyük qəhrəmanlıqlar göstərərək canını qurban verən hər kəsin əziz xatirəsi qarşısında baş əyirəm. Onlar həqiqətən qəhrəmanlar idi. O zaman güclü nizami ordumuz yaradılsaydı, şübhə etmirəm ki, əvvəla itkilərimiz qat-qat az olardı, ikincisi isə torpaqlarımız işğal altına düşməzdi. Canını vətən yolunda fəda etməyə hazır olan qəhrəmanlarımız nizami ordu halında birləşərək buna imkan verməzdi”.

Baş nazirin müavini deyib ki, artıq o illər arxada qalıb, Azərbaycan dəyişib: "Güclü iqtisadiyyatı var, sabitlik və əmin-amanlıq möhkəm qərar tutub, insanların rifahı gündən-günə yaxşılaşır, dünyada ölkəmizin nüfuzu yüksəlir. Xalqın iradəsi, Ali Baş Komandanın müdrikliyi və Ordumuzun qüdrəti sayəsində işğal olunmuş torpaqlarımızın geri qaytarılacağına kimsə şübhə etmir. Və o gün uzaqda deyil”.

Mirmahmud Kazımoğlu

Digər xəbərlər

Arxiv

date