Dövlət Komitəsi: Məscidlərə qadın imamların təyinatından söhbət getmir

Dövlət Komitəsi: Məscidlərə qadın imamların təyinatından söhbət getmir
# 02 avqust 2022 10:40 (UTC +04:00)

Məscidlərdə vəzifə tutmaq üçün müraciət edənlərin əksəriyyəti yerli təhsil müəssisələrində təhsil almış şəxslərdir.

APA xəbər verir ki, bunu jurnalistlərə açıqlamasında Dini Qurumlarla İş üzrə Dövlət Komitəsinin sədr müavini, müsahibə komissiyasının sədri Gündüz İsmayılov deyib.

O bildirib ki, məscidlərə təyinatla bağlı 3 vəzifə müəyyən edilib: Bunlar imam, imam müavini, dini ayinlərin icraçısı - müəzzindir:

“Bir də əlavə olaraq qadın dini ayinlərin icraçısı vəzifəsi nəzərdə tutulub. Xüsusi olaraq vurğulamaq istəyirəm ki, bəzən bilərəkdən və ya bilməyərək qadın dini ayinlərin icraçısı ilə bağlı fərqli fikirlər səsləndirilir. Elə təqdim edilir ki, guya komitə məscidlərə qadın imamlar təyin edəcək. Bu, qətiyyən belə deyil. Məscidlərə, ziyarətgahlara qadın imamların təyinatından söhbət getmir. Qadın dini ayinlərin icraçısı məscidlərdə sırf qadınlara yönəlmiş dini fəaliyyətlərlə məşğul olacaq. Eyni zamanda, imamın tapşırığına əsasən hüzr mərasimlərində iştirak edəcək”.

Gündüz İsmayılov əlavə edib ki, sənədlərini təqdim edən 270 namizəd imam və imam müavinləri vakansiyası üzrə müraciət edib: “Onlar arasında həm ölkədə, həm də xaricdə təhsil almış şəxslər var. Xaricdə təhsil alanların sayı cəmi 25 nəfərdir. Həmçinin müraciət edənlərdən 55 nəfər orta ixtisas, 215-i isə ali təhsil almış şəxslərdir. Bu il ilk dəfə İlahiyyat İnstitutu da məzun verib və müsahibədə bu institutun məzunları da iştirak edir. Lakin hazırda onların sayı azdır. Çünki çoxu hərbi xidmətə gedib. Hərbi xidmətdən qayıtdıqdan sonra onların sayının daha çox olacağını düşünürük”.

Sədr müavini həmçinin bildirib ki, müsahibə komissiyasının 7 üzvü var: "Onların hamısı istisnasız ilahiyyatçıdır. Onlardan 3-ü ilahiyyat üzrə fəlsəfə doktoru, digər üzvlər isə komitənin əməkdaşlarıdır və ölkədə dini vəziyyəti kifayət qədər bilən şəxslərdir. Onu da qeyd edim ki, müsahibə zamanı namizədlərə komitə tərəfindən hazırlanmış və təsdiqlənmiş müsahibə proqramı əsasında suallar verəcək. Onların həm dil, həm din, həm də dünyagörüşü öyrəniləcək. Namizədlər mərhələli şəkildə müsahibəyə dəvət olunacaq. Gün ərzində 30-35 namizədin müsahibəsinin təşkili nəzərdə tutulub. Bu ay ərzində müsahibə yekunlaşdırılacaq”.

Dövlət Komitəsinin rəsmisi onu da əlavə edib ki, növbəti vakansiya elanında qadın dini ayinlərin icraçısı vakansiyasının da olacağı nəzərdə tutulur.

#
#

ƏMƏLİYYAT İCRA OLUNUR