Yeni Azərbaycan Partiyasında Dini Qurumlarla İş üzrə Dövlət Komitəsinin təşkilatçılığı ilə “Dövlət və din modeli” adlı tədbir keçirilib.
APA-nın xəbərinə görə, YAP Gənclər Təşkilatı ilə birgə təşkil olunan tədbirdə dini dəyərlərin qorunması, din-dövlət münasibətlərinin tənzimlənməsi və maarifçilik işinin həyata keçirilməsi istiqamətində müzakirələr aparılıb.
Dini Qurumlarla İş üzrə Dövlət Komitəsinin şöbə müdiri Amil Cavadov bildirib ki, xüsusən gənclər arasında maarifçilik işlərinə xüsusi əhəmiyyət verilir. O qeyd edib ki, Azərbaycanda dini və mənəvi azadlıq təmin olunub, bütün dinlərdən və məzhəblərdən olan insanlar azad şəkildə öz ibadətlərini həyata keçirirlər: “Təəssüf ki, Azərbaycanda mövcud olan dini əmin-amanlığı pozmağa cəhd edən qüvvələr var. Amma inanırıq ki, sağlam düşüncəli vətəndaşlarımız bu məkrli siyasətin həyata keçirilməsinə imkan verməyəcək, bu sahədə fəal olacaqlar. Biz uğurlu dövlət-din modelini qorumalıyıq”.
Mənəvi Dəyərlərin Təbliği Fondunun icraçı direktoru Mehman İsmayılov gənclərlə aparılan maarifçilik işindən danışıb. O deyib ki, bu istiqamətdə bir sıra işlər görülüb və din tarixi, həqiqi inanc anlayışları ilə bağlı tədbirlər bundan sonra da davam etdiriləcək.
Tədbirdə qeyd olunub ki, Azərbaycan dünya ölkələrinə nümunə göstəriləcək dövlət-din münasibətlərinin xüsusi modeli mövcuddur. Bu modelin əsasında Azərbaycan xalqının xarakterik xüsusiyyəti kimi formalaşmış tolerant və multikulturalizm kimi ülvi dəyərlər dayanır.
Tədbir müzakirələrlə davam etdirilib.
Bizi Telegram-da izləyin
t.me/apa_az
Bizi Instagram-da izləyin
Bizi Facebook-da izləyin
Bizi Twitter-da izləyin
