Qara Qarayev avrokuboklarda 75-ci oyununu keçirib

Qara Qarayev avrokuboklarda 75-ci oyununu keçirib
# 11 iyul 2019 14:45 (UTC +04:00)

Azərbaycan çempionu “Qarabağ”ın futbolçusu Qara Qarayev avrokuboklarda 75-ci oyununu keçirib.

APA-nın məlumatına görə, bu yubiley Çempionlar Liqasının “Partizani” ilə matçına (0:0) təsadüf edib.

I təsnifat mərhələsinin ilk oyunu təcrübəli yarımmüdafiəçi üçün qitə miqyaslı turnirlərdə 75-ci olub. O, bu görüşlərin hamısını eyni komandada – “Qarabağ”da keçirib.

Q.Qarayev avrokuboklarda 2010-cu il iyulun 8-də debüt edib. O, ağdamlıların “Metalurq”la Makdoniyadakı qarşılaşmasında (1:1) ilk dəfə qitə səviyyəli klub turnirinin həyəcanını yaşayıb.

75 oyunda qol vurmayan futbolçu 18 sarı və 1 qırmızı vərəqə də alıb. Q.Qarayev üçün “Partizani” ilə görüş həm də Çempionlar Liqasındakı yubileylə əlamətdar olub. O, qitənin ən nüfuzlu klub turnirində 30-cu dəfə meydana çıxıb. Futbolçu digər 45 matçı Avropa Liqasında keçirib.

Qeyd edək ki, Q.Qarayev avrokuboklarda ən çox oyun keçirən Azərbaycan futbolçuları siyahısında 3-cü yerdədir. Onadək yalnız Rəşad Sadıqovla Maksim Medvedev 75-i arxada qoyub.

#
#

ƏMƏLİYYAT İCRA OLUNUR