İlber Ortaylının “Azerbaycan ve Kadim şehirleri” adlı kitabı təqdim olunub

İlber Ortaylı, Anar Kərimov, Akif Marifli

© APA | İlber Ortaylı, Anar Kərimov, Akif Marifli

# 06 oktyabr 2022 10:34 (UTC +04:00)

VIII Bakı Beynəlxalq Kitab Sərgisi çərçivəsində Xurşudbanu Natəvan təqdimat zonasında türk tarixçisi, böyük elm xadimi İlber Ortaylının "Azerbaycan ve Kadim şehirleri" adlı kitabının təqdimat mərasimi keçirilib.

Bu barədə APA-ya nazirlikdən məlumat verilib.

Bildirilib ki, təqdimatda İlber Ortaylı Azərbaycan dili, ədəbiyyatı, mədəniyyəti, tarixi haqqında geniş məruzə edib. O çıxışında bildirib ki, Türkiyə və Azərbaycan arasında həmişə dostluq, qardaşlıq olub. Bu baxımdan, Türkiyə ilə Azərbaycan birliyi siyasi birlik baxımından bir araya gələn ölkələr deyil, ortaq mədəniyyət, din, dil, sənət biliklərinə sahib məkanlardır. Bu iki dövləti birləşdirən bir çox dəyərlər, mənəvi bağlar var.

İlber Ortaylı çıxışında türk ədəbiyyatı və tarixi ilə bağlı bir çox konseptual məqamlara da toxunub. Alim XIV–XV əsrlərdə yaşamış hürufizm tərəfdarı İmadəddin Nəsimidən bəhs edərkən Nəsiminin ədəbi dili zənginləşdirmək üçün danışıq dilində və şifahi xalq ədəbiyyatındakı bənzətmə, kəlam və deyimlərdən istifadə etdiyini vurğulayıb, Nəsiminin müasirləri Mustafa Zərir, Qazi Bürhanəddin, Şah Qasım Ənvar və Cəlali sultanı Qiyasəddin Əhmədin türk dilində yazdıqlarını qeyd edib.

XVI əsrdə Səfəvi hökmdarları I İsmayıl və I Təhmasibin hakimiyyət dövrü inkişafın bu mərhələsində Azərbaycan türk dilinin və ədəbiyyatının tarixində ən parlaq dövr hesab edildiyini qeyd edən tarixçi alim Şah İsmayılın "Xətai" ləqəbi ilə əsasən Azərbaycan dilində, qismən fars dilində yazdığını diqqətə çatdırıb. Şah İsmayıldan başlayaraq təqribən bir əsr boyunca Səfəvi imperiyasında Azərbaycan dili sarayda, orduda və məhkəmədə istifadə edilib. Dövrün qızılbaş eliti linqvistik ideologiya və Azərbaycan dilində ədəbiyyatın inkişafına öz töhfəsini verib. Bu dövrdə İraqda yaşamış azərbaycanca, farsca, ərəbcə yazan Məhəmməd Füzuli Azərbaycan poeziyasının klassiki hesab edilir.

Daha sonra tarixçi alim ona ünvanlanan sualları cavablandırıb, iki qardaş ölkənin tarixi-ədəbi mətnlərini ortaq ədəbiyyat kontekstindən təhlil predmetinə çevirib.

#
#

ƏMƏLİYYAT İCRA OLUNUR