Beynəlxalq Muğam Mərkəzində "Şuşa - Zirvədən uca" və "Şuşa - Qarabağın ulduzu" adlı kitabların təqdimatı keçirilib.
APA xəbər verir ki, təqdimat mərasimində mədəniyyət naziri Anar Kərimov, AMEA prezidenti İsa Həbibbəyli, Üzeyir Hacıbəyov adına Bakı Musiqi Akademiyasının rektoru Xalq artisti Fərhad Bədəlbəyli, Milli Məclisinin deputatı Qənirə Paşayeva, Mədəniyyət Nazirliyinin Kitab dövriyyəsi və nəşriyyatlarla iş şöbəsinin müdiri Akif Marifli və digər mədəni-ictimai xadimlər, media mənsubları iştirak ediblər.
Mədəniyyət naziri Anar Kərimov sözügedən kitabların önəmindən danışıb: "Bu il Şuşa ilə bağlı bu cür kitabların nəşri ölkəmizdə cənab Prezident tərəfindən "Şuşa İli"nin elan edilməsi ilə bağlıdır. Şuşa şəhəri Azərbaycan üçün, onun mədəniyyəti üçün olduqca əhəmiyyətli və müqəddəsdir. Hansı ki bu torpağı və ümumilikdə Qarabağı ordumuzun qanı-canı bahasına, cənab Prezidentimizin güclü siyasəti nəticəsində azadlığa qovuşdurduq. Şuşanın mədəni mərkəz kimi, müqəddəs məkan kimi təbliğinin kitablarda, kataloqlarda da əksini tapması vacib və əhəmiyyətlidir".
Nazir çıxışından sonra “İrs” Nəşriyyat Evinin rəhbəri Musa Mərcanlını "Şuşa-270" döş nişanı təltif edib.
Çıxış edən AMEA prezidenti İsa Həbibbəyli kitabları "Şuşa ili"nə töhfə kimi qiymətləndirib: "Bu kitab, sözün əsl mənasında, Şuşanın tarixi pasportudur. Kitabda Şuşanın tarixi, mədəni dünyası özünü göstərməkdədir. Kitabda həmçinin Şuşanın Azərbaycan elminə, incəsənətinə bəxş etdiyi şəxsiyyətlər haqqında dəqiq informasiyalar da yer almaqdadır. Kitabdakı arxiv materialları, nadir sənədlər isə, dediyimiz kimi, bu ilə töhfədir".
Çıxışlar bitdikdən sonra təqdimat mərasimi bədii hissə ilə davam edib.
Qeyd edək ki, Azərbaycan-ingilis və Azərbaycan-rus dillərində hazırlanan kitablarda Şuşa şəhərinin qədim tarixi, mədəni həyatı, maddi-mədəni abidələri, işğal dövründə məruz qaldığı dağıntılar və azadlığa qovuşması zəngin mətn və fotofaktlarla təqdim olunub.
Bizi Telegram-da izləyin
t.me/apa_az
Bizi Instagram-da izləyin
Bizi Facebook-da izləyin
Bizi Twitter-da izləyin
