Nazir Fransa prezidentliyinə namizədin Qarabağa qanunsuz səfərinə münasibət bildirib

Ceyhun Bayramov

© APA | Ceyhun Bayramov

# 27 dekabr 2021 12:45 (UTC +04:00)

“Azərbaycan uzun illər hər zaman Fransa ilə münasibətlərin inkişafına xüsusi diqqət yetirib”.

APA-nın məlumatına görə, bunu bu gün xarici işlər naziri Ceyhun Bayramov ilin yekunlarına dair mətbuat konfransında bildirib.

Nazir deyib ki, iqtisadi, humanitar və digər sahədə əməkdaşlıqda böyük uğurlar olub: “Azərbaycan təbii ki, Fransa ilə münasibətlərin inkişafında maraqlıdır. Ötən il Vətən müharibəsi dövründə və müharibədən sonra Fransanın yüksək dövlət rəsmiləri tərəfindən birtərəfli, qərəzli açıqlamalar olub, Azərbaycan bunların qəbuledilməz olduğunu qarşı tərəfə çatdırıb. Ədalət naminə onu da qeyd etməliyəm ki, Fransa bu bəyanatları verməklə bərabər Azərbaycanla dialoqu davam etdirməkdə maraqlı olduğuna da işarə edirdi. Telefon danışıqları, görüşlər vasitəsilə Fransa Azərbaycanın mövqeyini dinləmək yolunda addımlar atırdı. Ötən dövrdə ikitərəfli münasibətlərin ritorikası, habelə Azərbaycan və Ermənistan XİN başçıları arasında Fransanın iştirakı ilə görüşlər keçirilib. Biz bu görüşlərdə balanslı mövqe müşahidə edirdik”.

Fransa prezidentliyinə namizəd Valeri Pekrezin Azərbaycanın Rusiya sülhməramlılarının nəzarətində olan ərazilərə qanunsuz səfərinə gəlincə, C. Bayramov qeyd edib ki, bununla bağlı Fransanın müvəqqəti işlər vəkili XİN-ə dəvət edilib, etiraz bildirilib: “Biz bunu da başa düşməliyik ki, bunların çoxu Fransa daxili siyasətinin gündəliyi ilə bağlıdır. Hazırkı Prezident Emmanuel Makrona rəqib olanların atdığı addımlardır. Bu, Fransada prezident seçkiləri öncəsi bu ölkədəki erməni əsilli vətəndaşların səslərini qazanmaq niyyəti ilə bağlıdır. Qanunsuz səfər zamanı Valeri Pekrezi müşayiət edən Fransanın keçmiş rəsmiləri və Avropa İttifaqının (Aİ) keçmiş rəsmisi də vardı. Onların da Azərbaycan XİN-in “qara siyahı”sına daxil edilməsi nəzərdə tutulub. Kim bizə uyğun olmayan mesajlar verəcəksə, onlara uyğun cavab verəcəyik. Əməkdaşlıq mesajına da eyni qaydada cavab veriləcək”.

Qeyd edək ki Fransada keçiriləcək prezident seçkilərində namizəd olan Valeri Pekrezlə yanaşı Aİ-nin Brexit danışıqları üzrə təmsilçisi olmuş (2019-2021) Mişel Barnier də Qarabağa qanunsuz səfər edib.

#
#

ƏMƏLİYYAT İCRA OLUNUR