Futbol

Ana səhifə

Futbol

Canni de Byazi Azərbaycan millisinə qol vurmağı unutdurub

25 mart 2021 14:41 (UTC +04:00)

Azərbaycan millisinin qol həsrəti oyundan-oyuna artır.

Apasport.az saytının məlumatına görə, artıq 6 oyundur qol vura bilməyən yığmamız Canni de Byazinin baş məşqçiliyi dövründə cəmi 2 dəfə rəqib qapısına yol tapıb.

Düzdür, son görüşdəki rəqib dünya nəhənglərindən olan Portuqaliya idi. Amma buna qədər də Monteneqro, Lüksemburq, Kipr kimi Avropanın 3-cü dərəcəli (C liqası 3-cü deməkdir), həmçinin Sloveniya kimi rəıqiblərlə 7 qarşılaşmada 2 top vurulub.

De Byazili yığmanın orta məhsuldarlığı 0,25-ə bərabərdir. Bu da millinin baş məşqçiləri arasında ən aşağı göstəricidir. Söhbət ən azı 2 dəfə komandanı meydana çıxaranlardan gedir. 1 oyunluq əvəzləyicilər (Nazim Süleymanov və Mahmud Qurbanov), həmçinin 1 görüşdə komandaya rəhbərlik edən məşqçilər şurası nəzərə alınmır. Çünki onların heç biri baş məşqçi olmayıb, bu vəzifənin müvəqqəti icraçısı olub.

Düzdür, de Byazi baş məşqçi əvəzi olanların qola həsrət qalması ilə öyünə bilər. Amma digərləri ilə müqayisədə geri qalır.

Təbii ki, ayrı-ayrı məşqçilərin dövründə rəqiblər fərqli ola bilər. Bəzi mütəxəssis daha çox seçmə oyununda, yəni daha ciddi və daha güclü rəqiblərlə, digəri nisbətən asan olan yoxlama matçlarında milliyə rəhbərlik edib. Lakin tarixdə qalan nəticədir.

Bu nəticələrə əsasən də orta məhsuldarlıqda De Byazinin komandası sonuncudur. Rekord isə Ələkbər Məmmədovun dövrünə məxsusdur. Həmin vaxt komanda 4 görüşdə 9 qol vurub.

Qurban Qurbanovlu yığma ikinci göstəriciyə malikdir. Əhməd Ələsgərovun rəhbərliyi altında da orta hesabla ən azı 1 qol vurulub.

yer	Baş məşqçi	oyun	qol	məhsuldarlıq
1	Ələkbər Məmmədov	4	9	2,25
2	Qurban Qurbanov	12	14	1,17
3	Əhməd Ələsgərov	9	9	1,00
4	Robert Prosineçki	23	22	0,96
5	Nikola Yurçeviç	10	8	0,80
6	Berti Foqts	71	56	0,79
7	Vaqif Sadıqov	33	22	0,67
8	Karlos Alberto Torres	18	12	0,67
9-10	Kazbek Tuayev	13	8	0,62
	Əsgər Abdullayev	13	8	0,62
11	Şahin Diniyev	20	12	0,60
12	İqor Ponomaryov	15	8	0,53
13	Ağasəlim Mircavadov	9	3	0,33
14	Qyoko Hacıyevski	3	1	0,33
15	Canni de Byazi	8	2	0,25