İspaniya klubu “Barselona” futbolçusu Luis Suaresin İtaliya təmsilçisi “Yuventus”a keçidinə razılıq verib.
Apasport.az saytının məlumatına görə, klublar arasında anlaşmanın detalları açıqlanıb.
Razılığa əsasən, müqavilə müddəti 2021-ci ilə qədər olan uruqvaylı hücumçu son ilin təzminatından imtina edib. “Yuventus” bu keçid üçün qarşı tərəfə 3 milyon avro ödəyəcək. Həmçinin kataloniyalılar daha 13 milyon avro bonus əldə edə bilər. Bu, turinlilərin Çempionlar Liqasında qrupdan çıxması, bu turnirdəki nəticələri və A seriyasını qazanmasından asılı olacaq.
33 yaşlı ulduz futbolçu isə yeni komandasında 12 milyon avro maaş, həmçinin daha 2 milyon avro mükafat əldə edəcək.
Qeyd edək ki, 2014-cü ildən “Barselona”da çıxış edən Luis Suares ötən mövsüm ümumilikdə 36 oyun keçirib, 21 qol, 10 assistlə yadda qalıb.