Son 10 ildə məğlubiyyətsiz çempion olan klubların adları açıqlanıb

Son 10 ildə məğlubiyyətsiz çempion olan klubların adları açıqlanıb
  • Clock-gray 11:39
  • calendar-gray 09 Mart 2021

“Reyncers” 10 illik fasilədən sonra Şotlandiya çempionluğunu qazanıb.

Apasport.az saytının məlumatına görə, Stiven Cerrardın yetirmələri əsas rəqib “Seltik”in büdrədiyi XXXI turda qızıl medalları təmin edib.

“Reyncers” son 6 matçda uduzmasa, mövsümü məğlubiyyətsiz çempion kimi başa vuracaq. Son 10 ildə Avropada 10 belə komanda olub.

Son 10 ilin məğlubiyyətsiz çempionlarını təqdim edirik.

“Şemrok Rovers” - 2020
Avropa futbolunda bunu bacaran 5-ci klub olan “Şemrok Rovers” 93 il gözlədi və ötən il uduzmadan çempionluğu qazandı.

PAOK – 2018/19
Yunanıstanda son illər “Olimpiakos”un əsas rəqibinə çevrilən PAOK 34 illik həsrətə 2018/19 mövsümündə son qoydu. Razvan Luçeskunun rəhbərliyi altında komanda keçirdiyi 30 oyunun cəmi 4-də xal itirdi ki, onda da rəqibləri ilə bərabərə qaldı.

“Nomme Kalyu” – 2018
Estoni təmsilçisi 98 illik tarixə malikdir. Köklü klub olmasına baxmayaraq, “Nomme Kalyu” cəmi 2 dəfə çempion olub. İlk çempionluğunu 2012-ci ildə qazanan komanda 2018-ci il mövsümündə məğlubiyyət üzü görmədi.

“Seltik” – 2016/17
“Reyncers” bu mövsüm “Seltik”in dörd il əvvəlki nailiyyətini təkrarladı. “Yaşıl-ağlar” həmin mövsüm Şotlandiya kubokunu və Şotlandiya Liqa Kubokunu da muzeyinə aparıb.

“Styarnan” – 2014
1960-cı ildə yaradılan “Styarnan”ın aktivində cəmi bir İslandiya çempionluğu var. Onu da məğlubiyyətsiz əldə ediblər. Komanda həmin mövsüm keçirdiyi 22 matçın heç birində uduzmayıb.

“Dinamo”, Zaqreb – 2014/15
21 çempionluqla Xorvatiyanın ən titullu komandası olan “Dinamo” son 15 mövsümün 14-də qızıl medalları heç kimə verməyib. Buna baxmayaraq, komanda cəmi bir dəfə - 2014/15 mövsümündə məğlubiyyətsiz çempion olub.

“Porto” – 2012/13
Avropanın güclü komandalarından olan “Porto” bu nailiyyəti 2012/13 mövsümündə əldə edib. Buna rəğmən klub liderliyi XXIX turda çempionluğu isə son turda qazanıb.

“Linkoln” – 2011/12
“Linkoln” Avropada məğlubiyyətsiz ən çox çempion olan komandadır. Cəbəllütariq təmsilçisi 2009/10 mövsümündən başlayaraq ardıcıl 3 mövsüm uduzmadan qızıl medallara layiq görülüb.

“Debretsen” – 2011/12
Macarıstanın ən köklü klublarından “Debretsen” 7 dəfə ölkə çempionu olub. 6-cı çempionluğuna 2011/12 mövsümündə məğlubiyyətsiz qovuşan komanda həmin vaxt Macarıstan kubokunu da muzeyinə aparıb.

“Yuventus” – 2011/12
2006-cı ildə danışılmış oyunlara görə aşağı liqaya göndərilən “Yuventus” bir il sonra A seriyasına qayıtsa da, çempionluq üçün gözləməli oldu. Turinlilər bu həsrətə 2011/12 mövsümündə son qoydu və keçirdiyi 38 görüşdə uduzmadı. “Qoca sinyora” həmin vaxtdan bəri çempionluğu heç kimə vermir.

ApaSport

Digər xəbərlər