"Neftçi” yarımmüdafiəçisi Dario Frederiko klubun rəsmi saytına müsahibə verib.
APA-nın məlumatına görə, ikinci dövrədə qələbələrin davamını gətirəcəyini bildirən braziliyalı futbolçu azarkeşləri sevindirmək üçün əlindən gələni edəcəyini deyib.
- Komandanın ilk dövrədəki nəticələrini necə dəyərləndirirsiz?
- Çempionata yaxşı başlamadıq. Buna baxmayaraq, son iki oyunda toparlanıb qələbə qazana bildik. İnanıram ki, ikinci dövrədə qələbələrin davamını gətirəcəyik.
- Qarşıdan "Zirə” ilə oyun gəlir. İlk dövrədə məğlub olduğumuz qəsəbə təmsilçisi ilə ümumi statistika da xeyrinizə deyil. Bu görüşdən nə gözləyirsiz?
- "Zirə” ilə ilk dövrədəki oyunda bəxtimiz gətirmədi. Yadımdadır, matça çox yaxşı başlasaq da, qol fürsətlərini boşa vermişdik. Qarşıdakı oyuna çox ciddi hazırlaşırıq. Bütün rəqiblərimizə hörmətlə yanaşırıq. Bilirəm ki, asan olmayacaq, amma meydana yalnız və yalnız qələbə qazanmaq üçün çıxacağıq.
- 6 çempionat matçında meydana çıxsaz da, qol vurmamısınız. Öz oyununu necə qiymətləndirirsiniz?
- Bu mövsümkü çempionatda qol hesabımı açmasam da, çalışıram oyunumla komandaya maksimum fayda verim. Mənim üçün əsas olan komandamızın nəticəsidir. Oyundan oyuna daha da artırmağa çalışıram.
- "Neftçi” ilk dövrədən sonra liderdən 10 xal geri qalaraq 3-cü yeri tutur. Sizcə, mövsümün sonunda komandanın turnir cədvəlindəki mövqeyi necə olacaq?
- Keçən mövsüm olduğu kimi, hədəfimiz yenə də çempionatın və kubokun qalibi olmaqdır. Liderlə 10 xallıq fərqə baxmayaraq sona qədər mübarizə aparacağıq. Qarşıda çox oyun var. Sonda hər şey ola bilər.
- Azarkeşlərə nə demək istərdiniz?
- Azarkeşləri keçən mövsüm olduğu kimi, bu mövsüm də hər zaman yanımızda görmək istəyirik. Onları sevindirmək üçün əlimizdən gələni edəcəyik.
Bizi Telegram-da izləyin
t.me/apa_az
Bizi Instagram-da izləyin
Bizi Facebook-da izləyin
Bizi Twitter-da izləyin
