Binəqədi bələdiyyəsinin rüşvət almaqda təqsirləndirən şöbə rəisinin həbs müddəti uzadılıb

Binəqədi bələdiyyəsinin rüşvət almaqda təqsirləndirən şöbə rəisinin həbs müddəti uzadılıb
  • Clock-gray 15:15
  • calendar-gray 03 Dekabr 2020

Binəqədi rayon Məhkəməsində rüşvət almaqda, sənədləri saxtalaşdırmaqda və epidemiya qaydalarını pozmaqda təqsirləndirilən Binəqədi qəsəbəsi Bələdiyyəsinin Bələdiyyə Gəlirlərinin və Yerli Vergilər Şöbəsinin rəisi Sahib Abışovun barəsində seçilmiş həbs qətimkan müddətinin uzadılması ilə bağlı istintaq orqanın təqdimatına baxılıb.

APA-nın məlumatına görə, hakim Abbas Rzayevin sədrliyi ilə keçirilən prosesdə təqdimat təmin edilib. Qərara əsasən, S. Abışovun həbs müddəti uzadılıb. 

Qeyd edək ki, Daxili İşlər Nazirliyinin Baş Mütəşəkkil Cinayətkarlıqla Mübarizə İdarəsinin əməkdaşları tərəfindən keçirilən xüsusi tədbir nəticəsində Binəqədi qəsəbəsi Bələdiyyəsinin sədri Niyaz Niftiyev və həmin qurumun Bələdiyyə Gəlirlərinin və Yerli Vergilər Şöbəsinin rəisi Sahib Abışov xüsusi karantin rejimi qaydalarını pozaraq sərbəst hərəkət etmək istəyən ayrı-ayrı şəxslərə onların qəsəbə ərazisində guya meyvə-tərəvəz və digər yeyinti məhsullarının satışı ilə məşğul olduqları barədə saxta arayışlar satan zaman xidməti otaqlarında saxlanılıblar.

Araşdırma zamanı Niyaz Niftiyev və Sahib Abışovun martın 31-dən aprelin 14-nə qədər müxtəlif şəxslərə karantin postlarında yoxlamalar zamanı təqdim etmək üçün 431 ədəd saxta arayış satdıqları məlum olub. Bununla da Niyaz Niftiyev və Sahib Abışov saxta sənəd satdıqları şəxslərin xüsusi karantin qaydalarının tələblərini pozaraq sərbəst hərəkət etməsinə şərait yaradıblar. İstintaqın gedişi zamanı saxta arayışların satıldığı şəxslərin də izahatları alınıb və onlar qeyd edilən saxta buraxılış sənədlərini pul müqabilində Binəqədi qəsəbə Bələdiyyəsindən əldə etdiklərini bildiriblər.

Faktla bağlı Baş İdarənin İstintaq və Təhqiqat İdarəsində Cinayət Məcəlləsinin 320.1-ci (Rəsmi sənədləri, dövlət təltiflərini, möhürləri, ştampları, blankları saxtalaşdırma, qanunsuz hazırlama, satma və ya saxta sənədlərdən istifadə etmə) və 139-1.1-ci (epidemiya əleyhinə və karantin rejimlərinin pozulması), 311-ci (rüşvət alma) maddələri ilə cinayət işi başlanılıb. Qeyd olunan cinayət əməllərini törətməkdə şübhəli bilinən Niyazi Niftiyev və Sahib Abışov tutularaq istintaqa cəlb olunublar.

Səlcuq Elçin

Digər xəbərlər