Hadisə

Qanunsuz miqrasiyaya görə ittiham olunan Azərbaycan Avropa Hərəkatının rəhbəri Ramin Hacılının cinayət işi üzrə məhkəmə prosesi davam etdirilib.

APA xəbər verir ki, bu gün Bakı Ağır Cinayətlər Məhkəməsində hakim Azad Məcidovun sədrliyi ilə keçirilən prosesdə məhkəmə istintaqı açıq elan edilib.

Prokuror ittiham aktını elan edib.

İttihama görə, “No Border Travel Agency” MMC-nin rəhbəri Ramin Hacılı, “Gəncliyin Elmi-Mədəni İnkişafı” ictimai birliyinin sədri Sərdar İsgəndərov, “Yes Travel” MMC-nin vəzifəli şəxsləri Sərxan Abdullayev, Üzeyir Bağırlı, “HMH Baku Travel” MMC-nin rəhbəri Nərminə Dadaşova, Zakir Əmirov, Əziz Səfərəliyev, Akif Əsədov külli miqdarda qazanc əldə etmək məqsədi ilə ABŞ, Kanada və Avropa ölkələrinə səfər etmələri üçün Azərbaycan Respublikasının vətəndaşlarına viza alınması və səfər etdikləri ölkələrdə mühacir statusu alaraq yaşaya bilmələri üçün iş yerindən arayış, bank hesabından çıxarış, daşınar və daşınmaz əmlaka mülkiyyət hüququnu təsdiq edən sənədlər, hüquq mühafizə orqanlarına çağırış məktubu, guya xəsarət almalarına dair tibbi arayış və digər hüquq verən rəsmi sənədləri saxtalaşdırıb satmaqla, onlara müraciət etmiş şəxslərin qanunsuz miqrasiyalarını təşkil ediblər.

İttiham aktı elan edildikdən sonra hakim müttəhimə ifadə verməyi təklif edib. Ramin Hacılı özünü təqsirli bilməyib və məhkəmənin xüsusi nəzarət altında keçirilməsini xahiş edib. Ramin Hacılı hazırkı mərhələdə ifadə vermək istəmədiyini, şahid və zərərçəkmişlər dindirilənlərdən sonra ifadə verəcəyini deyib.

Vəkil Rəşad Əliyev vəsatət qaldıraraq, dələduzluq, rüşvət verməyə təhrik və başqa ittihamlara xitam verilməsini istəyib. Vəkil bildirib ki, bu işdə mütəşəkkil dəstədən söhbət gedə bilməz:

“Mütəşəkkil dəstə anlayışı var. Bu işdə rollar müəyyənləşdirilməyib, pul bölgüsü yoxdur, hansı mütəşəkkil dəstədən söhbət gedir? Alınan pullar təyyarə biletləri və başqa xərclərə sərf olunub. Ramin Hacılını yalnız saxta sənəd məsələsində günahlandırmaq olar. Xahiş edirəm, onun əməlinə Cinayət Məcəlləsinin 320-ci (saxta sənəd hazırlama və ya istifadə etmə) maddəsi ilə hüquqi qiymət verilsin”.

Vəkilin bu vəsatəti baxılmamış saxlanılıb.

Daha sonra prosesdə şahid qismində "Gəncliyin Elmi-Mədəni İnkişafı” İctimai birliyində çalışan Lalə İbrahimova ifadə verib. O deyib ki, Ramin Hacılı ilə eyni ofisdə çalışıb: "Mənim işim ofisdə sənədlərin çapı ilə məşğul olmaq olub. Ramin Hacılıdan elektron poçt vasitəsi ilə gələn sənədləri çap eləmişəm. İbtidai istintaq vaxtı istintaqçılardan eşitdim ki, ofisdə işlədiyi müddətdə çap etdiyim sənədlər arasında saxtaları da olub".

Sonra şahid qismində Sənan Kərimov ifadə verib. O, məhkəmənin nəzərinə çatdırıb ki, Ramin Hacılını əvvəllər sosial şəbəkələrdən travel işləri ilə məşğul olan biri kimi tanıyıb, sonralar onun işlədiyi ofisə gedərək əyani tanış olub: “Ramin Hacılını sosial şəbəkələrdən izləyirdim, görürdüm ki, Avropa ilə əlaqələri var, insanlar ona müraciət edir, sonra ofisinə getdim, yaxından tanış oldum. Ofisə gedəndə də görürdüm ki, lövhəsi var, insanlara lövhənin qarşısında izah edirdi ki, ora nəyə görə gedirsiniz və s. Bizim aramızda iş münasibətləri olmayıb. Sadəcə olaraq, onu travel işini yaxşı təşkil edən biri kimi tanımışam. İşləməklə, gəzməklə bağlı yaxınlaşan adamların sənədlərinin hazırlanmasına, səfirliyə müraciət olunmasına, vizanın alınmasına kömək edirdi. Kiminsə viza alınmasında saxtakarlığa yol verdiyini görməmişəm”.

Proses iyunun 22-də davam etdiriləcək.

Xatırladaq ki, istintaqla müəyyən edilib ki, “No Border Travel Agency” MMC-nin rəhbəri Ramin Hacılı, “Gəncliyin Elmi-Mədəni İnkişafı” ictimai birliyinin sədri Sərdar İsgəndərov, “Yes Travel” MMC-nin vəzifəli şəxsləri Sərxan Abdullayev, Üzeyir Bağırlı, “HMH Baku Travel” MMC-nin rəhbəri Nərminə Dadaşova, Zakir Əmirov, Əziz Səfərəliyev, Akif Əsədov külli miqdarda qazanc əldə etmək məqsədi ilə ABŞ, Kanada və Avropa ölkələrinə səfər etmələri üçün Azərbaycan Respublikasının vətəndaşlarına viza alınması və səfər etdikləri ölkələrdə mühacir statusu alaraq yaşaya bilmələri üçün iş yerindən arayış, bank hesabından çıxarış, daşınar və daşınmaz əmlaka mülkiyyət hüququnu təsdiq edən sənədlər, hüquq mühafizə orqanlarına çağırış məktubu, guya xəsarət almalarına dair tibbi arayış və digər hüquq verən rəsmi sənədləri saxtalaşdırıb satmaqla, onlara müraciət etmiş şəxslərin qanunsuz miqrasiyalarını təşkil ediblər.

Qeyd edilənlərlə bağlı əvvəllər eyni xarakterli əməllərə görə dəfələrlə məhkum olunmuş Ramin Hacılı, eləcə də yuxarıda adları çəkilən digər şəxslər Cinayət Məcəlləsinin 178.3.1-ci (mütəşəkkil dəstə tərkibində dələduzluq) və digər maddələri ilə təqsirləndirilən şəxs qismində istintaqa cəlb olunublar.

Sonradan Ramin Hacılının işi ayrıca icraata verilib.