Regionlarda vətəndaşların telekommunikasiya xidmətlərinə olan tələbatını təmin etmək məqsədilə növbəti layihə Zaqatala rayonunda icra olunub.
Nəqliyyat, Rabitə və Yüksək Texnologiyalar Nazirliyindən “APA-Economics”ə verilən məlumata görə, layihə çərçivəsində “Aztelekom” MMC Zaqatalada əhatə dairəsini genişləndirib. Məqsəd əhali, müəssisə və təşkilatlara göstərilən telekommunikasiya xidmətlərinin keyfiyyətinin artırılmasıdır.
Qeyd edək ki, Zaqatalada mərkəzi xətt şəbəkəsi təmir edilərək müasir tələblər səviyyəsinə çatdırılıb, kabel-kanal sistemi texniki normalara gətirilib, köhnə dirəklər bərpa edilib, sıradan çıxmış dirəklər isə yeniləri ilə əvəz olunub. Eyni zamanda, əhalinin telefon və internet tələbatını ödəmək məqsədilə Uzunqazmalar, Danaçı, Aşağı Tala, Gözbarax, Lahıc kəndlərində texniki işlər aparılmaqla rabitə avadanlıqlarının tutumu artırılıb.
Rayonun Suvagil kəndində əhali sayının artması və yeni yaşayış evlərinin tikilməsi nəticəsində kəndin ərazisi kifayət qədər genişlənib. Kənd əhalisinin çoxsaylı müraciətlərini nəzərə alaraq, “Aztelekom” tərəfindən 384 ailənin mənzilinə və əraziyə telekommunikasiya xidmətlərindən istifadə etmək üçün müasir avadanlıq quraşdırılıb. Sakinlərin genişzolaqlı xidmətlərə qoşulması təmin edilib.
Son bir ildə “Aztelekom” tərəfindən həlli vacib bir sıra işlər görülüb, mərhələli şəkildə infrastruktur layihələri həyata keçirilib. Nəticədə rayonlar üzrə rabitə şəbəkəsinin genişləndirilməsi işləri aparılıb, həm magistral, həm də paylayıcı şəbəkələr müasirləşdirilib. Şəbəkə infrastrukturunun yenidən qurulması ilə yanaşı, regionlarda paralel olaraq indiyədək telefonlaşmayan, çətin coğrafi zonalarda yerləşən ərazilərdə də yeni elektron ATS-lər qurulub.
Bizi Telegram-da izləyin
t.me/apa_az
Bizi Instagram-da izləyin
Bizi Facebook-da izləyin
Bizi Twitter-da izləyin
