İnnovasiyalar həftəsi çərçivəsində kibertəhlükəsizlik üzrə vebinar keçirilib

İnnovasiyalar həftəsi çərçivəsində kibertəhlükəsizlik üzrə vebinar keçirilib
  • Clock-gray 18:11
  • calendar-gray 15 Dekabr 2020

InnoWeek – İnnovasiyalar həftəsi 2020” çərçivəsində Azərbaycan Nəqliyyat, Rabitə və Yüksək Texnologiyalar Nazirliyi və “Microsoft” şirkətinin birgə təşkilatçılığı ilə “Cyber Security Envisioning Workshop” – kibertəhlükəsizlik vebinarı keçirilib.

Nazirlikdən “APA-Economics”ə verilən məlumata görə, tədbirdə “Microsoft” şirkətinin yerli və beynəlxalq ekspertləri tərəfindən şirkətin kibertəhlükəsizlik sahəsində nailiyyətləri və Azərbaycan hökuməti ilə imzalanmış saziş çərçivəsində əldə olunmuş kibertəhlükəsizlik həlləri nümayiş etdirilib.

“Microsoft Azərbaycan” şirkətinin baş meneceri Qaçay Mirzəyev şirkətin kibertəhlükəsizlik həlləri barədə təqdimatla çıxış edib.

Qaçay Mirzəyev şanlı ordumuzun 44 günlük Zəfər yürüşü sayəsində 30 ilə yaxın bir dövrdə işğal altında olan torpaqlarımızda Azərbaycanın tarixi qələbəsi ilə ölkəmizin ərazi bütövlüyünün bərpa edildiyini bildirib. O, ordudan tərxis olunan hərbçilər arasında ingilis dilini bilən və kibertəhlükəsizliyə marağı olan gənclərin sahə üzrə bilik və bacarıqlarının artırılması məqsədilə “Microsoft” korporasiyasının “Military Affairs Education Portal” (miledu.microsoft.com) internet informasiya ehtiyatı haqqında məlumat verib.

Vebinarın gedişində sahə üzrə xarici ekspertlər müasir kibertəhlükəsizlik trendləri və həlləri barədə təqdimatlarla çıxış ediblər.

Ümumilikdə, yeni nəsil kibertəhdidlər və onlardan müdafiə yolları, kibertəhlükəsizliyin təmin edilməsində bulud həlləri, “Təhlükəsizlik üzrə Əməliyyat Mərkəzləri”nin qurulması və idarə edilməsi mövzularında məruzə və təqdimatlar edilib.

Bununla yanaşı, təcrübə mübadiləsinin həyata keçirilməsi məqsədilə virtual sual-cavab sessiyaları və müzakirələr təşkil olunub.

Hüseyn Vəliyev

Digər xəbərlər