“AzInTelecom” Müştəri Xidmətlərinin “SİMA Token”lə bağlı imkanlarını genişləndirdi

“AzInTelecom” Müştəri Xidmətlərinin “SİMA Token”lə bağlı imkanlarını genişləndirdi
# 18 aprel 2022 11:18 (UTC +04:00)

Rəqəmsal transformasiya ilə bağlı elektron imzalara artan tələbatın ödənilməsi üçün Rəqəmsal İnkişaf və Nəqliyyat Nazirliyinin (RİNN) tabeliyində fəaliyyət göstərən “AzInTelecom” MMC-nin Müştəri Xidmətləri təkmilləşdirilib.

Mərkəzi “Şəbəkə” ofisində yerləşən Müştəri Xidmətlərində xidmət operatorlarının sayı artırılıb və texniki imkanlar gücləndirilib. Nazirlikdən APA-Economics”ə verilən məlumata görə, vətəndaş məmnunluğunun artırılması üçün həyata keçirilən təkmilləşdirmə işləri sayəsində “SİMA Token”in verilməsi prosesinin sürətləndirilməsi, eləcə də daha operativ və keyfiyyətli xidmət göstərilməsi mümkün olacaq. Həmçinin bundan sonra Müştəri Xidmətlərində vətəndaş, sahibkar və hüquqi şəxslərlə yanaşı, dövlət qurumlarına da xidmət göstəriləcək.
Məlumat üçün bildirək ki, “SİMA Token” “AzInTelecom” MMC-nin “Elektron imza”nın bazasında yeni yaratdığı “SİMA” rəqəmsal imza platformasına daxildir. İndiyədək “Elektron imza” adı altında təqdim olunan imza sertifikatının funksionallığı dəyişməyib. “SİMA Token”ə “Elektron imza” ilə bağlı şərtlər və qaydalar çərçivəsində sahib olmaq olar.


İmza tələb edilən bütün sahələrdə tətbiqi mümkün olan “SİMA Token”i vətəndaşlar, hüquqi şəxslər, eləcə də sahibkarlar və dövlət qurumları əldə edə bilərlər. 3 iş günü ərzində hazır olan imza sertifikatının alınması zamanı vaxt itkisinin aradan qaldırılması məqsədilə onlayn müraciət imkanı da mövcuddur. Belə ki, lazım olan sənədlərlə token.sima.az saytı vasitəsilə müraciət etmək olar. İmza hazır olduqdan sonra Bakı üzrə “Şəbəkə” ofisindəki Müştəri Xidmətlərinə, regionlarlarda isə yaxınlıqdakı poçt filialına yaxınlaşmaq lazımdır.
Bundan əlavə, imza sertifikatının itirilməsi, oğurlanılması, texniki zədələnməsi və bu kimi digər hallarda da qeyd edilən ünvanlara müraciət olunmalıdır.


Məlumat üçün bildirək ki, “AzInTelecom” Müştəri Xidmətləri Bakı şəhəri, Üzeyir Hacıbəyli küçəsi 72 ünvanındakı 1 saylı “Şəbəkə” ofisində yerləşir. Müştəri Xidmətləri həftə içi hər gün, eləcə də bayram günləri saat 09:00-dan 18:00-a kimi işləyir.
Qeyd edək ki, “SİMA Token”lə bağlı yaranan çətinlik və suallarla əlaqədar “157” Çağrı Mərkəzinə də zəng etmək olar.

#
#

ƏMƏLİYYAT İCRA OLUNUR