İqtisadi

InvestAZ İnvestisiya şirkətinin analitikləri bu həftə üzrə dünya maliyyə bazarlarında son vəziyyət və qısa müddət ərzində gözlənilənlərlə bağlı məlumat verib.

EUR

Dünya valyuta birjalarında EUR/USD valyuta cütlüyünün qiyməti son bir həftə ərzində üç ilin maksimum səviyyələrinə yaxın mövqedə ticarət edilib. Beləliklə, noyabr ayında 1.15$-a ticarət edilən qiymətin, iki ay ərzində 1.21$-a kimi bahalaşdıqdan sonra artım dalğası 1.24$-a kimi də güclənə bilər. Bu, qiymətin 1.21$-ın üzərində möhkəmlənməsi fonunda baş verə bilər.

Qeyd etmək lazımdır ki, növbəti günlər ərzində açıqlanacaq fundamental məlumatlar da, qiymətin gələcək istiqamətinin güclənməsində vacib rol oynayacaqdır. Xüsusilə də ABŞ və Avrozonanın işsizlik və inflyasiya göstəriciləri diqqət mərkəzində saxlanılmaqdadır.

GBP

GBP/USD qiyməti isə son iki ay ərzində 4.5% bahalaşıb. Dünya birjalarında dolların ucuzlaşması və neft qiymətlərində bahalaşma, funt sterlinqə müsbət təsir edən əsas amillərdir. Təhlillərə əsasən, 1.3560$-a ticarət edilən qiymət son bir il yarımın maksimum səviyyələrində möhkəmlənərsə, artım dalğası 1.3787$-a kimi də davam edə bilər.

Bu həftənin çərşənbə günü Bakı vaxtı ilə saat 13:30-da açıqlanacaq İngiltərənin sənaye sektoru ilə bağlı önəmli statistik məlumatlar da böyük maraqla gözlənilir.

TRY

Türkiyə bazarlarında da dolların qiyməti proqnozlaşdırıldığı kimi ucuzlaşmaqda davam edir. Artıq 3.73TL-ə kimi ucuzlaşan USD/TRY məzənnəsi 3.72TL-ə kimi ucuzlaşmaqla bu səviyyənin altında qalarsa, əlavə olaraq 3.68TL-ə kimi ucuzlaşa bilər.

OIL

Enerji bazarlarında Avropanın Brent markalı neftinin bir barel qiyməti 67.00$-ın üzərində ticarət edilməkdədir. Qiymət 68.03$-a kimi dəyər qazanarsa və üzərində möhkəmlənərsə, bahalaşma 68.21 və 70.06$-a kimi də güclənə bilər.

Neftə olan tələbin artması ilə bağlı xəbərlər, qiymətlərin bahalaşmasına təsir edən əsas amillərdir.

GOLD

Əlvan metallar bazarlarında isə qiymət 1326$-a (42.5 $/qram) kimi bahalaşdıqdan sonra cümə günü 13$-lıq (0.4 $/qram) korreksiya edib. Hal-hazırda 1320$-ın (42.3 $/qram) üzərində ticarət edilən qızılın bir unsiya üzrə qiyməti yenidən 1326$-a kimi bahalaşa bilər. Növbəti mərhələdə qiymət sözügedən səviyyənin üzərində möhkəmlənərsə, artım dalğasının 1357$-a (43.5 $/qram) kimi də güclənəcəyi proqnozlaşdırılır. Dünyada iqtisadi qeyri-müəyyənliklər qızıla olan tələbin artmasına səbəb olur.

İnvestisiya ilə bağlı suallarınızı *1234 telefon nömrəsi və www.investaz.az veb saytı vasitəsilə bizə ünvanlaya bilərsiniz.

“İnvest-AZ İnvestisiya Şirkəti” QSC-nin

Analitika Departamenti

“İnvest-AZ İnvestisiya Şirkəti” Qapalı Səhmdar Cəmiyyətinin fəaliyyəti Azərbaycan Respublikası Maliyyə Bazarlarına Nəzarət Palatası tərəfindən tənzimlənir. Şirkət, 09.01.2016-cı il tarixli 087986 saylı lisenziyası əsasında broker, anderraytinq (diler), marja ticarəti (forex), fərdi investorların portfelinin idarə edilməsi, market meykerlik və sair investisiya xidmətləri üzrə fəaliyyət göstərməkdədir.

_____________________________________________________________________________

Risk bildirişi.

Yuxarıda göstərilən məlumatlar tamamilə tövsiyə xarakterlidir. Bu fəaliyyət üzrə həyata keçirilən əməliyyatlar yüksək risk qrupuna daxildir və “İnvest-AZ İnvestisiya Şirkəti” QSC yuxarıda göstərilən məlumatlar əsas götürülməklə, həyata keçirilən investisiya əməliyyatları üzrə heç bir öhdəlik daşımır.