Deputat: “Büdcədən kinoya ayrılan pula ancaq cizgi filmi çəkmək olar”

Rüfət Quliyev, Milli Məclisin  İqtisadi siyasət, sənaye və sahibkarlıq komitəsinin üzvü

© APA | Rüfət Quliyev, Milli Məclisin İqtisadi siyasət, sənaye və sahibkarlıq komitəsinin üzvü

# 25 may 2022 13:16 (UTC +04:00)

“Kino sahəsinə büdcədən 5-6 milyon manat pul ayrılır. Halbuki bütün dünyada bu sahəyə daha çox pul ayrılır və kinodan qazanc 40-60 % artıqlaması ilə qayıdır. Təbii ki, keyfiyyətli kinodan söhbət gedir. İstərdim ki, biz bu məsələyə diqqəti artıraq. Mən demirəm ki, vəsait elə-belə ayrılsın. Vəsait verilsin və bunun nəticəsi tələb edilsin. Bizim büdcədən ayrılan 5-6 milyon manata ancaq cizgi filmi çəkmək olar”.

APA xəbər verir ki, bunu Milli Məclisin İqtisadi siyasət, sənaye və sahibkarlıq komitəsinin bu gün keçirilən iclasında “Azərbaycan Respublikasının 2021-ci il dövlət büdcəsinin icrası haqqında” qanun layihəsinin müzakirəsi komitənin üzvü Rüfət Quliyev deyib.

Rüfət Quliyev inflyasiya ilə bağlı problemə də toxunub: “Təklif edirəm ki, inflyasiya ilə bağlı xüsusi proqram yaradılsın. Biz kənd təsərrüfatının daha sürətlə inkişafı üçün çalışmalıyıq. Kənd təsərrüfatının özümüzün istehlak məhsullarımızı qarşılamasına nail olmalyıq”.

Deputat kredit faizlərinin yüksək olmasına diqqət çəkib: “İnflyasiyanın qarşısını almaq üçün kiçik və orta müəssisələrin açılması lazımdır. Bu da birbaşa maliyyə ilə bağlıdır. Bu, yüksək faizlərlə kreditlərlə mümkün olmur”.

Rüfət Quliyev içməli su probleminin həll edilməməsinə də toxunub: “Lənkəranın 2 kəndində insanlar susuz qalıb, “Azərsu” ilə mütəmadi məktublaşırdıq. Onlar deyir ki, vəsait yoxdur. Həmin kəndlərdə şəhid ailələri və qazilər də yaşayır”.

Deputat təklif edib ki, Hesablama Palatası qanunsuzluqlar edən dövlət adamları, şirkət, müəssisə rəhbərləri barədə məlumatları hüquq-mühafizə orqanlarına təqdim edildikdən sonra hansı tədbirlərin görülməsi barədə ictimaiyyəti məlumatlandırsın.

#
#

ƏMƏLİYYAT İCRA OLUNUR