“Qala Maşınqayırma” ASC 2022-ci il üzrə maliyyə hesabatlarını açıqlayıb.
“APA-Economics” şirkətin maliyyə hesabatlarına istinadən xəbər verir ki, 2022-ci ildə “Qala Maşınqayırma” 120 min 65 manat xalis zərər edib. 2021-ci şirkət 26 min 226 manat xalis mənfəət əldə etmişdi.
Hesabat dövründə şirkətin əməliyyat gəlirləri 2021-ci illə müqayisədə 64.1% artaraq 1 milyon 652.1 min manat, əməliyyat xərcləri isə 52% artaraq 1 milyon 433.8 min manata yüksəlib. Şirkətin əməliyyat mənfəəti 218.3 min manata bərabər olub ki, buda illik müqayisədə 3.4 dəfə çoxdur. Bu dövrdə sair əməliyyat xərclərinin 7.3 dəfə artaraq 148.2 min manat, fövqəlada xərclərinin isə 13.8 dəfə artaraq 211.9 min manat təşkil etməsi nəticəsində şirkət zərərlə üzləşib.
Ötən il “Qala Maşınqayırma” ASC-nin öhdəlikləri artıb, aktivləri isə azalıb. Belə ki, 2022-ci ildə şirkətin cəmi aktivləri əvvəlki illə müqayisədə 1.3% azalaraq 2 milyon 801,3 min manat, cəmi öhdəlikləri isə 53.2% artaraq 239.5 min manata bərabər olub.
2023-cü ilin yanvar ayının 1-nə “Qala Maşınqayırma” ASC-nin cəmi kapitalı 2 milyon 561.9 min manat təşkil edib ki, bu da illik müqayisədə 4.5% çoxdur.
“Qala Maşınqayırma” ASC neft-mədən sahələri üçün vacib sayılan avadanlıqlar, yəni ştanq elevatorları və tutucu tərtibatlı boru elevatorları, yuyucu fırlanğıc, dayaq traversinin düyümü, mexaniki çıxarıcı və bir sıra məhsulların istehsalçısıdır.
Bizi Telegram-da izləyin
t.me/apa_az
Bizi Instagram-da izləyin
Bizi Facebook-da izləyin
Bizi Twitter-da izləyin
