Azərbaycanda ləğv olunan banklarda qorunmayan əmanətlər üzrə 69 mln. manata yaxın kompensasiya ödənilib

Azərbaycanda ləğv olunan banklarda qorunmayan əmanətlər üzrə 69 mln. manata yaxın kompensasiya ödənilib
# 19 oktyabr 2020 17:00 (UTC +04:00)

Əmanətlərin Sığortalanması Fondu (ADIF) 68,5 mln. manat təşkil edən qorunmayan əmanətlər üzrə Konstitusiya Məhkəməsinin qərarına əsasən ləğv prosesində olan bankların əmanətçilərinə 48 mln. manatdan çox vəsaitin ödənişini təmin edib.

Bunu "APA-Economics"ə ADIF-in icraçı direktoru Tural Piriyev deyib.

Onun sözlərinə görə, sözügedən proses çərçivəsində bu günədək ümumi sayı olan 1 636 nəfər müştərinin 1 440 nəfərinə vəsait artıq ödənilib: "Cəmi 196 nəfər qalıb ki, onların vəsaiti də qrafikə uyğun ödəniləcək".

Qeyd edək ki, bu ilin iyul ayında Fond ləğv prosesində olan "Atabank" ASC, "AG Bank" ASC və "NBC Bank" ASC-də təshih tədbirlərinin təsirinə düşən əmanətlərin qaytarılması üçün Konstitusiya Məhkəməsinə müraciət olunması məqsədilə Nazirlər Kabinetinə məktub ünvanlayıb. Ləğv prosesində olan banklar maliyyə bazarlarına nəzarət orqanı tərəfindən fiziki şəxslərdən müddətli əmanətlərin qəbulu, qorunan əmanətlərin həcminin artımı, mövcud əmanətlərin şərtlərinin dəyişdirilməsi yolu ilə qorunan əmanət statusuna aid edilməsinə dair əməliyyatların həyata keçirilməsinin dayandırılmasına dair təshih tədbirləri tətbiq edilib. Təshih tədbirlərinin tətbiq olunmasına baxmayaraq, sözügedən banklar tərəfindən əmanətlər qəbul olunub, qorunan əmanətlərin həcminin artımı, mövcud əmanətlərin şərtlərinin dəyişdirilməsi yolu ilə qorunan əmanət statusuna aid edilməsinə dair əməliyyatların həyata keçirilməsi müəyyən olunub. Bundan əlavə, "Atabank" ASC-yə təyin olunan müvəqqəti inzibatçının ƏSF-yə təhvil verdiyi ləğv prosesində olan "Atabank" ASC-nin əmanətçilər qarşısında öhdəliklərinin reyestrində əmanətçilərin depozitlərinin bir hissəsi səhvən qorunmayan əmanət kimi qeydə alınıb.

Konstitusiya Məhkəməsinin qərarına əsasən ləğv prosesində olan təshih tədbirlərinin tətbiqindən sonra qəbul edilmiş, həcmi artırılmış və şərtləri dəyişdirilmiş əmanətlər qorunan əmanət hesab edilib, həmçinin ləğv prosesində olan "Atabank"ın əmanətçilər qarşısında öhdəliklərinin reyestrində səhvən qorunmayan əmanət kimi qeydə alınmış əmanətlər üzrə bank əmanəti müqaviləsi əmanətçinin əmanəti banka verdiyi andan bağlanmış sayılması və ilkin (əsas) müqavilə kimi qəbul olunması qərara alınıb.

Xatırladaq ki, sözügedən əmanətlərin qaytarılmasına 14 avqust 2020-ci il tarixdən başlanılıb.

#
#

ƏMƏLİYYAT İCRA OLUNUR