Azərbaycanın xarici dövlət borcu açıqlanıb

Azərbaycanın xarici dövlət borcu açıqlanıb
# 23 dekabr 2020 14:44 (UTC +04:00)

"Büdcə zərfi"nə daxil olan məlumatlardan əsasən, hazırda xarici dövlət borcunun həcmi 8,9 mlrd. ABŞ dolları təşkil edir.

"APA-Economics"in məlumatına görə, bu barədə "Azərbaycan Respublikasının 2021-ci il dövlət büdcəsi haqqında" Qanun layihəsinə Hesablama Palatasının verdiyi rəydə bildirilir.

Xatırladaq ki, bu, İqtisadiyyat Nazirliyinin proqnozuna əsasən 2020-ci ildəki gözlənən ÜDM-in 21,1%-nə bərabərdir.

Qeyd olunub ki, Azərbaycanın xarici dövlət borcunun 2020-ci ilin gözlənilən ÜDM-ə nisbəti 21,3% səviyyəsində olacağı nəzərdə tutulub.

"Cari il üçün birbaşa dövlət borcunun ÜDM-ə nisbəti üzrə proqnozlaşdırılmış göstərici Strategiya ilə müəyyən edilmiş hədəfə uyğundur. Dövlət borcunun 2020-ci ilin gözlənilən ÜDM-nə nisbəti 21,3% səviyyəsində nəzərdə tutulub. Həm ortamüddətli, həm də uzunmüddətli dövrdə ölkə iqtisadiyyatının ehtiyaclarını nəzərə almaqla dövlət borcunun dayanıqlılığını təmin edilməsi 1-ci strateji məqsəd kimi müəyyənləşdirilmiş və bu məqsədlə 2018-2025-ci illər üzrə ümumi dövlət borcunun ÜDM-ə nisbətinin yuxarı həddinin 30%-dən çox olmaması və 2025-ci ilədək 20%-dən aşağı salınması hədəfi gözləniləcək. Hazırda bu nisbət ötən illə müqayisədə 0,6 faiz bəndi artsa da, Strategiyada müəyyən edilən hədəfə uyğundur", - rəydə deyilir.

Həmçinin qeyd olunub ki, növbəti il üçün dövlət borcu və öhdəliklərinin maliyyələşdirilməsi ilə bağlı proqnozlaşdırılmış göstərici (müvafiq funksional təsnifat üzrə) 7,7% olmaqla Strategiya ilə müəyyən edilmiş hədəfə uyğundur.

Strategiyada ümumi dövlət borcuna xidmət xərclərinin dövlət büdcəsi xərclərinə nisbətinin 15%-dən aşağı olması müəyyən edilib.

Qeyd edək ki, beynəlxalq təcrübədə borcun xərclərə deyil, gəlirlərə nisbəti əsas götürülür. Hazırda strategiyada müəyyən edilən hədəf isə özündə iqtisadi mahiyyət ehtiva etmir. Məhz bu səbəbdən Hesablama Palatası tərəfindən aparılan qiymətləndirmələrdə analitik göstərici kimi məhz borca xidmətlə bağlı xərclərin büdcə gəlirlərinə nisbəti əsas götürülür.

#
#

ƏMƏLİYYAT İCRA OLUNUR