Yaponiyanın avtomobil istehsalçısı olan "Nissan Motor" şirkətinin 2019-2020-ci maliyyə ilinin (sentyabrın 30-da bitib) birinci yarısında xalis zərəri 3,1 mlrd. ABŞ dolları təşkil edib.
"APA-Economics"in məlumatına görə, bu barədə şirkətin maliyyə hesabatında deyilir. İstehsalçının bir səhm üzrə zərəri hesabat dövründə 0,8 dollara bərabər olub (ötən ilin analoji dövründə bir səhm üzrə mənfəət 0,16 dollar təşkil edib). Satışlardan formalaşan gəlir isə illik müqayisədə 38,2% azalaraq 29,4 mlrd. dollara enib.
Təkcə maliyyə ilinin II rübündə "Nissan"ın xalis zərəri ötənilki 559,5 mln. dollardan 421 mln. dollara enib, bir səhm üzrə zərəri isə 0,1 dollara bərabər olub, halbuki ötən ilin eyni dövründə səhm üzər mənfəət qeydə alınıb – 0,14 dollar. Hesabat rübündə, şirkətin satış gəliri illik müqayisədə 27% azalaraq 18,2 mlrd. dollar təşkil edib.
"Nissan Motor" cari maliyyə ili üçün proqnozlarını yaxşılaşdırıb. Belə ki, "Nissan" maliyyə ilində satış gəlirlərinin 75,3 mlrd. dollara çatacağını gözləyir (ötən proqnoz 74 mlrd. dollar).
Xatırladaq ki, "Nissan Motor" Yaponiyanın ən böyük avtomobil istehsalçılarından biridir. 1933-cü ildə təsis edilən şirkət hazırda "Renault-Nissan-Mitsubishi" alyansına daxildir.
Bizi Telegram-da izləyin
t.me/apa_az
Bizi Instagram-da izləyin
Bizi Facebook-da izləyin
Bizi Twitter-da izləyin
