2019-2020-ci maliyyə ilində (sentyabrın 30-da bitib) Almaniyanın "Siemens AG" sənaye konserninin xalis mənfəəti illik müqayisədə 25,6% azalaraq 4,2 mlrd. avroya enib.
"APA-Economics"in məlumatına görə, bu barədə şirkətin maliyyə hesabatında deyilir.
Qeyd olunur ki, konsernin bir səhm üzrə seyrəltilmiş mənfəət ötənilki 6,32 avrodan bu il 4,93 avroya enib. Satışlardan formalaşan gəlirlər 2,3% azalaraq 57,139 mlrd. avro təşkil edib.
Təkcə 2019-2020-ci maliyyə ilinin IV rübündə "Siemens"in xalis mənfəəti 1,879 mlrd. avroya bərabər olub ki, bu da illik müqayisədə 28% çoxdur. Səhm üzrə seyrəltilmiş mənfəət 1,61 avrodan 2,17 avroya yüksəlib. Lakin sonuncu rübdə satışdan əldə olunan gəlirlər 6,5% azalaraq 15,312 mlrd. avro təşkil edib.
Qeyd edək ki, Almaniya nəhənginin 2020-2021-ci maliyyə ilinə olan proqnozuna əsasən, valyuta məzənnələrinin dalğalanmasına baxmayaraq, şirkətin xalis mənfəəti 4,2 mlrd. avrodan artıq olacaq.
Xatırladaq ki, 1847-ci ildə təsis edilən "Siemens AG" konserni elektrotexnika, elektronika, enerji avadanlığı, nəqliyyat, tibbi avadanlıq və işıqlandırma mühəndisliyi, eləcə də müxtəlif sənaye, nəqliyyat və rabitə sahələrində ixtisaslaşmış xidmətlər sahəsində dünya liderlərindən biridir.
Bizi Telegram-da izləyin
t.me/apa_az
Bizi Instagram-da izləyin
Bizi Facebook-da izləyin
Bizi Twitter-da izləyin
