Rusiyada qar uçqunu nəticəsində turist qrupunun üzvü olan uşaq ölüb - YENİLƏNİB

Rusiyada qar uçqunu nəticəsində turist qrupunun üzvü olan uşaq ölüb - YENİLƏNİB
  • Clock-gray 22:27
  • calendar-gray 22 Mart 2021

Rusiyanın Murmansk vilayətində qar uçqunu altında qalmış turist qrupundan olan uşaq ölüb.

APA xəbər verir ki, bu barədə “RİA Novosti”yə bölgənin təcili yardım xidmətinin nümayəndəsi bildirib.

Məlumata görə, bu, 2008-ci il təvəllüdlü qız uşağıdır. Rusiya Fövqəladə Hallar Nazirliyi qrupun digər üzvlərinin tibbi yardıma ehtiyacının olmadığını bildirib.

“Qar kütləsi ​​altından 2008-ci il təvəllüdlü yetkinlik yaşına çatmayan bir uşaq çıxıb. Qalan qrup üzvlərinin heç birinin tibbi yardıma ehtiyacı yoxdur, vəziyyətləri qənaətbəxşdir”, - deyə nazirliyin məlumatında qeyd olunub.

***

Saat 21:09

Rusiyanın Murmansk vilayətinin Oleneqorsk şəhəri ərazisində qar uçqunu olub. Nəticədə xüsusi vasitələrlə təchiz olunmamış turistlərdən ibarət qrupun qar uçqununun altında qaldığı ehtimal olunur.

APA TASS-a istinadən xəbər verir ki, bu barədə Oleneqorsk şəhərinin rəhbəri Oleq Samarski açıqlama verib. Onun sözlərinə görə, qar uçqunu nəticəsində xəsarət alanlar ola bilər.

“Oleneqorsk yaxınlığında qar uçqunu olub. Orada 15 nəfərdən ibarət qrupun olması güman edilir. Onların hansı cığırla getdikləri hələlik məlum deyil. Hadisə yerində xilasedicilər çalışır”, - Samarski belə deyib.

İstintaq Komitəsinin bölgə üzrə rəsmilərinin verdiyi məlumata görə, uçqun baş verən ərazidə azyaşlıların ola biləcəyi ehtimal edilir: “Rusiya Federasiyası İstintaq Komitəsinin Murmansk vilayəti üzrə İstintaq İdarəsinə məlumat daxil olub ki, İmandra stansiya bölgəsində nəzarət olunmayan marşrutda turistlərdən ibarət qrup qar uçqununun altında qalıb. İlkin məlumata görə, hadisə nəticəsində xəsarət alanlar var. Rusiya İstintaq Komitəsinin müstəntiqi və məhkəmə ekspertləri hadisə yerinə yollanıblar. Xəsarət alanların arasında azyaşlılar da ola bilər”.

Rusiya Fövqəladə Hallar Nazirliyinin məlumatına görə, uçqun altında uşaq var. Orada 13-ü uşaq olmaqla daha 15 nəfər ola bilər: “Turistik qrup 16 nəfərdən ibarətdir, onlardan 13-ü yetkinlik yaşına çatmayanlardır”.

Hadisə İmandra stansiyasından 5 km aralıqda, Murmansk vilayətinin xizək marşrutlarının keçdiyi Monçeqorsk və Oleneqorsk bölgələrinin sərhədində baş verib. Mənbənin verdiyi məlumata görə, turistlər bir marşrut seçsələr də, başqa bir marşrutla gediblər.

Sərxan Kamallı

Digər xəbərlər