Rusiya Prezidenti Vladimir Putin Ermənistanın Baş naziri Nikol Paşinyanla nəqliyyat arteriyalarının açılmasını və böhranlı vəziyyətin nizamlanması məsələsini müzakirə etdiyini bildirib.
APA-nın Moskva müxbirinin məlumatına görə, bu barədə Rusiya Prezidenti İrəvanda Paşinyanla ikitərəfli görüşdə bildirib.
“Biz sizinlə görüşəndə, hələ maşında gedəndə regional məsələləri, o cümlədən regionda nizamlanma məsələlərini müzakirə etdik, nəqliyyat arteriyalarının açılmasından danışdıq”, deyə Putin qeyd edib.
***
22.34
Rusiya Prezidenti Vladimir Putinlə Ermənistanın Baş naziri Nikol Paşinyan arasında görüş başlayıb.
APA-nın Moskva müxbirinin məlumatına görə, Putin-Paşinyan ikitərəfli danışıqları İrəvanda keçirilir.
Qeyd edək ki, bu gün İrəvanda Kollektiv Təhlükəsizlik Müqaviləsi Təşkilatının sammiti keçirilib.