Əbülfəs Qarayev Fransa, Əlcəzair və İordaniyanın səfirləri ilə görüşüb

Əbülfəs Qarayev Fransa, Əlcəzair və İordaniyanın səfirləri ilə görüşüb
  • Clock-gray 18:06
  • calendar-gray 10 Fevral 2020

Fevralın 10-da Mədəniyyət naziri Əbülfəs Qarayev Fransa, Əlcəzair və İordaniyanın Azərbaycandakı səfirləri ilə görüşüb.

Mədəniyyət Nazirliyindən APA-ya verilən məlumata görə, Fransanın səfiri Zaxari Qross, Əlcəzair Xalq Demokratik Respublikasının səfiri xanım Səlimə Abdelhaq və İordaniya Haşimilər Krallığının səfiri Sami Abdullah Ğoşehi ilə keçirilən görüşlərdə ölkələrimiz arasında mədəniyyət sahəsində əməkdaşlıq imkanları, gələcək perspektivlər və həyata keçiriləcək layihələr haqqında müzakirələr aparılıb.

Nazir görüşlər zamanı qonaqları bu il Bakıda keçiriləcək VII Beynəlxalq Humanitar Forumda iştiraka dəvət edib. O, həmçinin hər iki ildən bir ölkəmizdə təşkil edilən Ümumdünya Mədəniyyətlərarası Dialoq Forumunun əhəmiyyətindən söz açıb, 2008-ci ildə Azərbaycan Respublikasının Prezidenti İlham Əliyev tərəfindən irəli sürülmüş mədəniyyətlərarası dialoqa dair “Bakı Prosesi”nin əhəmiyyətini vurğulayıb.

Qeyd olunub ki, “Bakı Prosesi” artıq qlobal əhəmiyyətli platforma kimi BMT tərəfindən yüksək qiymətləndirilir, Azərbaycanın bu istiqamətdə atdığı addımlar təqdir olunur. Nazir bu mötəbər tədbirdə də adıçəkilən ölkələrin yüksək səviyyəli nümayəndələrinin iştirakından məmnun olacağımızı diqqətə çatdırıb.

Görüşlərin sonunda hər üç ölkə ilə mədəniyyət sahəsində əməkdaşlığın genişləndirilməsi məqsədilə Fəaliyyət planının işlənib hazırlanması barədə razılığa gəlinib.

Mirmehdi Ağaoğlu

Digər xəbərlər