“Media Reyestrinə jurnalistlərin müraciət etməsi üçün tələb onun əmək və ya mülki müqaviləsinin olmasıdır”.
APA xəbər verir ki, bunu Medianın İnkişafı Agentliyinin Hüquq xidmətinin rəhbəri Rəqsanə Kərimova deyib.
O bildirib ki, dövlət qurumlarında mətbuat xidmətlərində çalışan şəxslərin də jurnalist kimi hansısa media subyekti ilə əmək və ya mülki müqaviləsi varsa, reyestrə daxil ola bilər: “Eyni zamanda, həmin şəxslər digər tələblərə də cavab verməlidir”.
Media Reyestri Xidmətinin rəhbəri Cahangir Həsənli qeyd edib ki, onlayn media subyektlərinin Media Reyestrinə müraciət etməsi üçün bir sıra tələblər var: “Bunlardan biri ay ərzində 20 öz materialını dərc etməsi tələbidir. Bu və digər tələblərə cavab verən saytlar Reyestrə müraciət edə bilər”.
MEDİA-nın Kommunikasiya şöbəsinin müdiri Səidə Şəfiyeva isə əlavə edib ki, jurnalistin Media Reyestrinə müraciəti üçün əsas şərt ali təhsil və onun jurnalistika sahəsində 3 illik təcrübəsinin olmasıdır: “Digər tərəfdən, jurnalistin işlədiyi media subyektinin davamlı fəaliyyət göstərməsi onun vəsiqə alması üçün əsas şərtdir”.