Olimpiada

Bakıda keçirilən Avropa Gənclər Yay Olimpiya Festivalında güləş yarışlarının ikinci günü başa çatıb.

APA-nın məlumatına görə, ümumilikdə 7 çəki dərəcəsində final və 3-cü yer uğrunda qarşılaşmalar baş tutub.

Yunan-Roma və sərbəst güləşin hərəsində iki, qadın güləşində üç çəkidə qaliblər bəlli olub. Azərbaycan milli komandası günü 6 medalla - 2 qızıl, 3 gümüş və 1 bürünc mükafatla yekunlaşdırıb.

Yunan-Roma güləşində Qurban Qurbanovun (48 kq) qızıl medal uğrunda görüşdəki rəqibi Xviça Abuladze (Gürcüstan) olub. 6:0 hesablı qələbə qazanan idmançımız qızıl medala yiyələnib.

Həsrət Cəfərov (60 kq) finalda Maqomed Qiqiyevlə (Rusiya) qarşılaşıb. 7:0 hesablı qələbə qazanan idmançımız festivalın çempionu adına sahib olub.

Qadın güləşində də iki idmançımız medal uğrunda qarşılaşmada qüvvəsini sınayıb. Gültəkin Şirinova (46 kq) finalda Georgiana-Lavinia Antuka (Rumıniya) ilə münasibətinə aydınlıq gətirib. Güləşçimiz görüşə fəal başlasa da, yekunda gümüş medalla kifayətlənib.

Mərziyə Sadıqova (61 kq) çempionluq üçün italiyalı Aurora Russo ilə üz-üzə gəlib. 4:10 hesabı ilə uduzan milli üzvü ikinci yeri tutub.

Sərbəst güləşdə Mircavad Nəbiyev (48 kq) bürünc medal uğrunda Tomas Fişeri (İsveçrə) sınağa çəkib. 10:0 hesablı qələbə qazanan təmsilçimiz fəxri kürsünün üçüncü pilləsinə qalxıb.

Sabir Cəfərov (60 kq) finalda rusiyalı Fyodor Baltuyevlə güləşib. Rəqibin üstünlüyü ilə keçən görüş həmyerlimizin 3:7 hesablı məğlubiyyəti ilə başa çatıb.

Beləliklə, millimizin qazandığı mükafatların sayı 10-a çatıb. Bunlardan 4-ü qızıl, 4-ü gümüş, 2-si bürüncdür.

Qeyd edək ki, daha öncə güləş üzrə milli komanda 4 medal qazanıb. Sərbəst güləşçilər Murad Haqverdiyev (45 kq) qızıl, Əbülfəz Nəsirov (55 kq) gümüş, yunan-Roma güləşçiləri Fərid Sadıxlı (45 kq) qızıl, Nihad Məmmədli (55 kq) bürünc mükafat əldə edib.

***

Saat. 13:35

Avropa Gənclərinin Olimpiya Festivalı (EYOF) çərçivəsində güləş yarışları davam edir.

APA-nın məlumatına görə, ikinci yarış günündə 7 çəkidə qaliblər müəyyənləşəcək.

Azərbaycan yığması bu çəki dərəcələrinin hər birində təmsil olunub. Sərbəst güləşdə 1, yunan-Romada 2 və qadın güləşində 2 həmyerlimiz finala vəsiqə qazanıb. Daha bir sərbəst güləşçi isə bürünc üçün mübarizə aparacaq. Medal döyüşləri saat 16:00-da başlayacaq.

Sərbəst güləş
48 kq
Mircavad Nəbiyev mübarizəyə 1/8 finaldan başlayıb. Onun Maqomedamin Bekbulatovla (Rusiya) görüşü 6:6 hesabı ilə yekunlaşsa da, rəqibi sonuncu xal prinsipinə uyğun mərhələ adlayıb.

Rusiyalı güləşçi finala yüksəldiyindən təmsilçimiz təsəlli verici görüşə qatılıb. Şükrü Korpeni (Türkiyə) 10:0 hesabı ilə məğlub edən M. Nəbiyev bürünc medal görüşü üçün Tomas Fişerlə (İsveçrə) qarşılaşacaq.

60 kq
Sabir Cəfərov 1/8 finalda macarıstanlı Marsel Deliyə 10:0 hesabı ilə qalib gəlib. O, növbəti mərhələdə Anatoli Xranikanı (Belarus) da məğlub etməkdə çətinlik çəkməyib – 12:1. Güləşçimiz yarımfinalda İvan Stoyanovla (Bolqarıstan) üz-üzə gəlib və rəqibi üzərində 5:1 hesablı qələbə qazanıb.

S. Səfərov finalda rusiyalı Fyodor Baltuyevlə güləşəcək.

Yunan-Roma güləşi
48 kq
Qurban Qurbanovun da startı uğurlu alınıb. İdmançımız öncə Kaçper Karaskieviçə (Polşa) 8:0, ardınca Emin Çakıra (Türkiyə) 10:0 hesabı ilə qalib gəlib. Q. Qurbanov finala gedən yolda Maksim Stupakeviçdən (Belarus) üstün olub. O bu dəfə 5:0 hesablı qələbəyə sevinib.

Q. Qurbanov qızıl medal üçün Xviça Abuladzeni (Gürcüstan) sınağa çəkəcək.

60 kq
Həsrət Cəfərov debütdə Donatas Rindeykisdən (Litva) üstün olub. 12:0 hesabı ilə qələbə qazanan idmançı 1/4 finalda Mikita Muraşkanı (Belarus) 13:5 hesabı ilə məğlub edib. O, yarımfinalda gücünü Andrea Settiyə (İtaliya) də göstərib – 6:0.

Yeniyetmə idmançı finalda Maqomed Qiqiyevlə (RUS) qarşılaşacaq.

Qadın güləşi

46 kq
Gültəkin Şirinova 1/8 finalda finlandiyalı Jutta Ala-Rantanı 7:4 hesabı ilə üstələyib. Həmyerlimiz Belarusu təmsil edən Tatyana Pertsavanı da 6:1 hesabı ilə məğlub edərək, yarımfinala yüksəlib. G. Şirinova bu mərhələdə Fanni Viquronı (Fransa) da üstələyib – 10:3.

Güləşçi həlledici qarşılaşmada Georgiana-Lavinia Antuka (Rumıniya) ilə münasibətinə aydınlıq gətirəcək.

49 kq
Lalə Mirzəyeva debütdə Moldova güləşçisiylə bacarmayıb. O, Mihaela Samoilə 2:8 hesabı ilə uduzub.

61 kq
Mərziyə Sadıqova da yarışa 1/8 finaldan qoşulub. O, ardıcıl olaraq Manola Skobelska (Ukrayna, 6:3), Alina Kasabyeva (Rusiya, *1:1) və Elmas Çeliki (Türkiyə, 1:0) məğlub edərək, finala vəsiqə qazanıb.

İdmançı finalda italiyalı Aurora Russo ilə qüvvəsini sınayacaq.

Qeyd edək ki, Azərbaycan güləşçiləri Festivalın ilk günündə 2 qızıl, 1 gümüş və 1 bürünc medal qazanıblar.