Azərbaycanda özəlləşdirmə və icarədən dövlət büdcəsinə ötən il 72 mln. manata yaxın vəsait daxil olub

Azərbaycanda özəlləşdirmə və icarədən dövlət büdcəsinə ötən il 72 mln. manata yaxın vəsait daxil olub
  • Clock-gray 14:36
  • calendar-gray 19 Yanvar 2021

2020-ci ildə Azərbaycanda özəlləşdirmə və icarədən dövlət büdcəsinə 71,8 mln. manat vəsait daxil olub.

İqtisadiyyat Nazirliyindən “APA-Economics”ə verilən məlumata görə, il ərzində 47 hərrac keçirilib. Hərraclarda 5 səhmdar cəmiyyətinin səhm paketi, 24 kiçik dövlət müəssisəsi, 2 qeyri-yaşayış sahəsi, 3 yarımçıq tikili və 100 nəqliyyat vasitəsi özəlləşdirilib.

Ötən il hərraca çıxarılan dövlət əmlakı üzrə 53 elektron sifariş qəbul edilib, 5 dövlət əmlakı “Elektron hərrac” xidməti vasitəsilə özəlləşdirilib.

2020-ci il ərzində qeyri-yaşayış sahələrinin icarəyə verilməsi üzrə 258 müqavilə bağlanıb, 320 icarə müqaviləsinin müddəti uzadılıb. Müəssisə və obyektlərin yerləşdiyi torpaq sahələri üzrə isə ümumilikdə 160 icarə müqaviləsi bağlanıb, 4 icarə müqaviləsinin müddəti artırılıb. 2020-ci ildə özəlləşdirmədən dövlət büdcəsinə daxilolmalar 61,5 mln. manat təşkil edib və illik proqnoz 99,2% icra olunub. Dövlət əmlakının icarəsindən isə büdcəyə 10,3 mln. manat ödənilib və illik proqnoza 128,8% əməl edilib.

Ümumilikdə, ötən il dövlət əmlakının özəlləşdirilməsi və icarəyə verilməsindən dövlət büdcəsinə 71,8 mln. manat vəsait daxil olub və illik proqnoz 102,6% yerinə yetirilib. Bununla yanaşı, Azərbaycan Respublikasının Prezidentinin 2020-ci il 19 mart tarixli və Nazirlər Kabinetinin 2020-ci il 04 aprel tarixli Sərəncamlarına əsasən, dövlət əmlakına dair bağlanan  icarə müqavilələri üzrə sahibkarlara 1.350 min manat həcmində güzəşt tətbiq olunub.

Hüseyn Vəliyev

Digər xəbərlər