Dövlət əmlaklarının özəlləşdirilməsi üzrə növbəti hərrac sentyabrın 3-də keçiriləcək.
Əmlak Məsələləri Dövlət Komitəsindən “APA-Economics”ə verilən məlumata görə, hərraca 55 dövlət əmlakı çıxarılıb.
Onların arasında səhmdar cəmiyyətlərin dövlətə məxsus səhm paketləri, eləcə də nəqliyyat vasitələri var.
Elan edilən hərraca çıxarılan səhmdar cəmiyyətləri Yevlax, İsmayıllı, Goranboyda yerləşir.
Sərmayəçilər “Biləsuvar Broyler”, “Ağdaş Quşçuluq”, “Zərdab Aqrotexservis” kimi dövlət müəssisələrinin 30% ilə 45% arasında olan səhm paketlərinin özəlləşməsinə qoşula bilər. Hərraca çıxarılan səhmdar cəmiyyətlərindən biri Qax şəhəri, Ü.Hacıbəyov küçəsindəki “Qax Taxıl” dövlət müəssisəsidir. Taxıl məhsullarının tədarükü, emalı və satışı üzrə fəaliyyət göstərən müəssisənin torpaq sahəsi 84,9 min kv.m, tikili sahəsi isə 22.6 min kv.m-dir. Səhmdar cəmiyyətinin ərazisində idarə binası, yeməkxana, qarğıdalı quruducu sexləri, çörək sexi, un dəyirmanı, müxtəlif təyinatlı anbarlar və digər tikililər mövcuddur.
Avtomobil sahibi olmaq istəyənlərin budəfəki hərracda geniş seçim imkanları var. Belə ki, buraxılış tarixi 2006-2008 olan VAZ, QAZ və "Hyundai" markalı nəqliyyat vasitələri hərraca çıxarılıb.
Özəlləşməyə çıxarılan dövlət əmlakları üzrə hərracda iştirak etmək istəyənlər komitənin rəsmi saytına (emdk.gov.az) və ya Özəlləşdirmə portalına (privatization.az) daxil ola bilər.
Bizi Telegram-da izləyin
t.me/apa_az
Bizi Instagram-da izləyin
Bizi Facebook-da izləyin
Bizi Twitter-da izləyin
