Bu gün “Caspian European Club”ın sədrinin birinci müavini və baş icraçı direktoru Telman Əliyevin sədrliyi ilə “Caspian European Club”un üzv şirkətlərinin top-menecerlərinin ümumi toplantısı təşkil olunub.
“Caspian European Club”dan “APA-Economics”ə verilən məlumata görə, ümumi toplantıda İdarə Heyətinin üzvlərinin, komitə rəhbərlərinin, “Caspian European Club”a daxil olan sahə və sahələrarası işçi qruplarının rəhbərlərinin hesabatları dinlənilib.
İclas çərçivəsində yeni inkişaf strategiyası, “Caspian European Club”ın üzv şirkətlərini maraqlandıran sual və təkliflər müzakirə olunub, həmçinin dördüncü rüb ərzində biznes-forumların, dəyirmi masaların və “CEO Lunch”ın təşkil olunacağı dövlət məmurlarının siyahısı tərtib edilib. Əsas diqqət beynəlxalq layihələrin inkişafına və “Caspian European Club”ın Gürcüstan, Qazaxıstan, Özbəkistan, Ukrayna, Türkiyə və ofis, eləcə də daimi nümayəndəliklərin olduğu digər ölkələrdəki fəaliyyətinin irəliləyişinə yetirilib.
Yeni strategiyaya əsasən, “Caspian European Club” tərəfdaşları ilə birgə aylıq “Caspian Energy Investor” və illik “Caspian Energy Index” nəşrlərini bərpa edəcək. Hər iki layihə yalnız abunə yolu ilə əldə olunacaq və orada qanunvericilikdəki dəyişikliklər, investisiya təklifləri, tenderlər, Xəzər-Qara dəniz və Baltik regionu ölkələrində fəaliyyət göstərməkdə maraqlı olan sahibkarlar və investorlar üçün faydalı məlumatlar öz əksini tapacaq.
Yeni strategiyada həmçinin sahibkarların qeyri-rəsmi xarakterli aylıq tədbirlərdə iştirak etmək istəkləri əks olunacaq. Ənənəvi tədbirlər kimi bu görüşlər də şirkətlər arasında netvorkinqin yaxşılaşmasına xidmət edəcək. Sonda hər rübdə ümumi toplantıların təşkili ilə bağlı qərar qəbul edilib. Eyni zamanda İdarə Heyətinin üzvlərinin, komitə rəhbərlərinin, sahə və sahələrarası işçi qrup rəhbərlərinin növbəti seçkilərinin tarixi açıqlanıb. Ümumilikdə Klubun İdarə Heyətinin hazırkı tərkibinin fəaliyyəti uğurlu qiymətləndirilib.
Qeyd edək ki, sıralarında dünyanın 50 ölkəsindən 5 mindən artıq şirkət və təşkilatı birləşdirən “Caspian European Club” 2002-ci ilin iyununda yaradılıb. “Caspian European Club”ın mənzil-qərargahı Bakıda (Azərbaycan) yerləşir. Klubun həmçinin Gürcüstan və Qazaxıstanda rəsmi nümayəndəlikləri, ABŞ və Almaniyada səlahiyyətli nümayəndələri var.
Bizi Telegram-da izləyin
t.me/apa_az
Bizi Instagram-da izləyin
Bizi Facebook-da izləyin
Bizi Twitter-da izləyin
